'ఎందుకు పోటీ చేయట్లేదో అడ్వాణీయే చెప్పాలి'

ఎల్​కే. అడ్వాణీ.. ఈసారి భాజపా తరఫున లోక్​సభ ఎన్నికల్లో పోటీ చేయకపోవడం చర్చనీయాంశమైంది. అయితే... తాజాగా ఇదే అంశంపై భాజపా సీనియర్​ నాయకురాలు, కేంద్ర మంత్రి ఉమాభారతి స్పందించారు. ఈ విషయంపై స్పందించాల్సింది అడ్వాణీ మాత్రమేనని వ్యాఖ్యానించారు.

'ఎన్నికల్లో పోటీ చేసినా.. చేయకున్నా ఎల్​కే. అడ్వాణీ స్థాయి తగ్గదని వ్యాఖ్యానించారు' కేంద్ర మంత్రి ఉమాభారతి. ఎన్నికల్లో పోటీ చేయని అంశంపై స్పందించాల్సింది అడ్వాణీయే అన్నారు. నరేంద్ర మోదీ ప్రధాని మంత్రి అయ్యేలా.. భాజపాను ఈ స్థాయికి తీసుకురావడంలో అడ్వాణీ కీలక పాత్ర పోషించారని కొనియాడారు. సుదీర్ఘ రాజకీయ జీవితంలో అడ్వాణీ ఎన్నడూ పదవుల కోసం ఆశపడలేదని తెలిపారు.

'పోటీ చేయకపోవటంపై స్పందించాల్సింది కేవలం అడ్వాణీనే. నాతో సహా మరెవ్వరూ దీని గురించి అభిప్రాయాలు చెప్పలేరు.'

- ఉమా భారతి, కేంద్ర మంత్రి

భాజపా కురువృద్దుడు అడ్వాణీ 1998 నుంచి గుజరాత్​లోని గాంధీనగర్​ స్థానం నుంచి గెలుస్తూ వచ్చారు. ఇప్పుడు ఈ స్థానం నుంచి భాజపా జాతీయాధ్యక్షుడు అమిత్​ షా కు టికెట్​ కేటాయించింది. దీనిపై అడ్వాణీ నుంచి గానీ, అధిష్టానం నుంచి గానీ ఎలాంటి ప్రకటనా రాలేదు.

వయసు ఆధారంగా టికెట్లు కేటాయించకూడదని అభిప్రాయం వ్యక్తం చేశారు ఉమాభారతి. కొందరు యువ ఎంపీలకూ ఈసారి టికెట్​ దక్కలేదని గుర్తుచేశారు. ఇటీవలే పార్టీ ఉపాధ్యక్షురాలిగా నియమితులైన ఉమా భారతి స్వయంగా ఎన్నికల్లో పోటీ నుంచి తప్పుకున్నారు. మరోసారి తిరుగులేని మెజారిటీతో మోదీనే ప్రధానమంత్రి కావాలని ఆకాంక్షించారు.

యువనేతల్ని ప్రోత్సహించే దిశగా ఆలోచిస్తుంది భాజపా. ఈ సారి లోక్​సభ ఎన్నికల్లో సీనియర్లు శాంత కుమార్​, బీసీ. ఖండూడీ, కరియా ముండా వంటి ప్రముఖులకు టికెట్​ దక్కలేదు. ఇందులో కొంతమంది పోటీ చేయట్లేదని ప్రకటించారు. అయితే.. అడ్వాణీ అభ్యర్థిత్వం చర్చనీయాంశమైంది.