కరోనా భూతంపై డీఆర్​డీఓ మేధో యుద్ధం

ఎన్నడూ చూడని విపత్తు. కంటికి కనిపించని శత్రువు. ఎలా ఎదుర్కోవాలో తెలియని పరిస్థితి. నివారణ మొదలు చికిత్స వరకు ప్రతి విషయమూ కొత్తే. ఇలా... మానవ మేధో శక్తికి సవాలు విసురుతోంది కరోనా. ఆ మహమ్మారిపై పోరాడేందుకు తన వంతు ప్రయత్నం చేస్తోంది రక్షణ పరిశోధన, అభివృద్ధి సంస్థ.

'కరోనా యుద్ధం మధ్యలో ఉన్నాం. అది కూడా కనిపించీ కనిపించని శత్రువుతో యుద్ధం. కనిపించే శత్రువుతో పోరాడాలంటే ఆయుధాలు సరిపోతాయి. ఇది కంటికి కనిపించదు. అందుకే అలాంటి శత్రువుతో యుద్ధానికి డీఆర్‌డీఓ మేధస్సుతో సమాయత్తమవుతోంది' అని డీఆర్‌డీఓ ఛైర్మన్‌, రక్షణ మంత్రి సలహాదారు జి.సతీష్‌రెడ్డి చెప్పారు. కరోనా వైరస్‌ వ్యాప్తి పెరుగుతున్న నేపథ్యంలో దాని నివారణకు డీఆర్‌డీఓ చేపడుతున్న చర్యలను 'ఈనాడు'కు ఇచ్చిన ప్రత్యేక ఇంటర్వ్యూలో వివరించారు.

కరోనా కట్టడిలో డీఆర్‌డీఓ పాత్ర ఏమిటి

వైరస్‌ కనిపించని శత్రువు. దాన్ని జయించేందుకు కీలకపాత్ర పోషిస్తున్నాం. పలు ఉత్పత్తులు మేధో మథనం స్థాయి దాటి కార్యరూపంలోకి తీసుకువచ్చే దశలో ఉన్నాయి. కొన్ని ఉత్పత్తి దశలో ఉన్నాయి.

మాస్కులు, శానిటైజర్లు, వెంటిలేటర్లు ఎప్పుడు అందుబాటులోకి వస్తాయి?

మాస్కులు, శానిటైజర్లు పూర్తి స్థాయిలో ఉత్పత్తి అవుతున్నాయి. తొలివిడతగా కొన్నింటిని తెలంగాణ ప్రభుత్వానికి ఇస్తున్నాం. వెంటిలేటర్ల నమూనాలకు కేంద్ర ప్రభుత్వం నుంచి అనుమతి లభించింది. తయారీ కోసం ప్రయివేటు సంస్థలకు ఇచ్చాం.

నూట్రీషియస్‌ ఫుడ్‌ తయారీలో డీఆర్‌డీఓకు అనుభవం ఉంది కదా? కరోనా బాధితుల కోసం ఎలాంటి ఏర్పాట్లు చేస్తున్నారు?

జరగరానిది ఏమైనా జరిగితే, ఆహారానికి కొరత రాకూడదనే వ్యూహంతో రెడీమేడ్‌ ఆహారాన్ని తయారు చేసి నిల్వ చేస్తున్నాం. ఆహార కొరతకు అవకాశం ఉండవచ్చని కొన్ని దేశాలను ప్రపంచ ఆరోగ్య సంస్థ అప్రమత్తం చేసింది. ఆ దేశాల జాబితాలో భారతదేశం లేదు. అది వేరే విషయం.

ఎన్ని వెంటిలేటర్లు సిద్ధం చేస్తున్నారు.. ఎగుమతి ఆలోచనేమైనా ఉందా?

వైరస్‌ సోకే వారి సంఖ్య, అందులో వెంటిలేటర్లు అవసరమయ్యే వారెంత మంది అనేది వైద్యనిపుణులు అంచనా వేస్తారు. ఆ మేరకు చేస్తున్నాం. వెంటిలేటర్ల కొరతతో ఇబ్బంది పడుతున్న దేశాలకు మన వంతు సాయంగా పంపాలనుకుంటే కేంద్రం ఆ పని చేయొచ్చు.

వెంటిలేటర్లు రోజుకు ఎన్ని తయారు చేస్తున్నారు? వ్యయం ఎంత?

వారానికి 30 వేల వరకు తయారు అవుతాయి. ఈ వారంలో ఒక బ్యాచ్‌ వస్తుంది. రానున్న రోజుల్లో వాటి ఉత్పత్తి మరింతగా పెంచుతాం. ఒక్కో వెంటిలేటర్‌ తయారీకి సుమారు రూ. నాలుగు లక్షల వరకు వ్యయం అవుతోంది.

కరోనా వైరస్‌కు చెక్‌ పెట్టేందుకు ఔషధాలు, వ్యాక్సిన్‌ తయారీలో డీఆర్‌డీఓ ఏమైనా భాగస్వామి అవుతుందా?

ఆపత్కాలంలో సైన్యానికి అవసరమైన వైద్య సేవలు అందించేందుకు వైద్య రంగంలోని శాస్త్రవేత్తలతో కలిసి పని చేస్తున్నాం.

సైన్యం, శాస్త్ర సాంకేతిక నిపుణులు వైరస్‌ బారిన పడకుండా ఎలాంటి చర్యలు తీసుకుంటున్నారు?

సరిహద్దుల్లో ఉన్న సైన్యం మొదలు, ఇతర ప్రాంతాల్లో ఉన్న రక్షణ సిబ్బందికి మాస్కులు, శానిటైజర్లను పూర్తి స్థాయిలో అందుబాటులో ఉంచాం. మిలిటరీ వైద్యులను ఇప్పటికే అప్రమత్తం చేశాం.

వైరస్‌ బాధితులకు సేవలందిస్తున్న వైద్యుల రక్షణ కోసం చేస్తున్న సూట్స్‌ ఎప్పుడు అందుబాటులోకి వస్తాయి?

అత్యంత రక్షణాత్మకమైన రెండు రకాల నమూనాలు సిద్ధం చేశాం. నిపుణుల కమిటీ కూడా యుద్ధ ప్రాతిపదికన వాటికి ఆమోద ముద్ర వేసింది. ఒక్కో సూటు తయారీకి సుమారుగా రూ. ఎనిమిది వేల వరకు వ్యయం అవుతుంది. వారానికి లక్షన్నర సూట్లు అందుబాటులోకి వస్తాయి.