3 పరోటాలు తింటే రూ.లక్ష ప్రైజ్.. జీవితాంతం భోజనం ఫ్రీ!

భీమిలి కబడ్డీ జట్టు సినిమా గుర్తుందా? అందులో హాస్యనటుడు ధన్​రాజ్​ పరోటాలు తినే సన్నివేశం సినిమాకే హైలైట్​. 50 పరోటాలు తినాలనే పందెంలో నెగ్గి.. అందరినీ ఆశ్చర్య పరుస్తాడు​. అలాంటి పందెమే ప్రకటించాడు ఓ హోటల్​ యజమాని. 50 నిమిషాల్లో 3 పరోటాలు తింటే లక్ష రూపాయలు, జీవితాంతం భోజనం ఉచితమని ప్రకటించాడు. ఈ అద్భుత ఆఫర్​ ప్రకటించిన ఆ హోటల్​ ఎక్కడుంది. ఆ పరోటాలో ఉన్న ప్రత్యేకలు, పందెంలో ఉన్న మెలిక ఏంటి తెలుసుకుందాం.

పరోటా అంటే మీకు చాలా ఇష్టమా.. రెండు మూడు ప్లేట్లయిన సులభంగా లాగించేస్తారా.. అయితే మీరు కచ్చితంగా హరియాణాలోని రోహ్​తక్​కు వెళ్లాల్సిందే. రుచికరమైన పరోటాలే కాదు.. ఓ హోటల్​లో పెట్టిన పందెంలో పాల్గొని గెలిస్తే లక్ష రూపాయలు మీ సొంతం. ఆ విశేషాలు మీ కోసం.

రోహ్​తక్​లోని తపస్య హోటల్​.. దేశంలోనే అతిపెద్ద పరోటాలకు పెట్టింది పేరు. జంబో పరోటాలు ఇక్కడే లభిస్తాయి. భోజన ప్రియులకు ఓ సవాల్​ విసిరారు.. ఆ హోటల్​ యజమాని. తమ హోటల్​లో 50 నిమిషాల్లో 3 జంబో పరోటాలు తింటే లక్ష రూపాయలు ఇస్తానని ప్రకటించాడు. అంతే కాదండోయ్​.. జీవితాంతం భోజనం ఉచితం కూడా. హోటల్​ ప్రారంభించినప్పటి నుంచి ఇప్పటివరకు కేవలం ఇద్దరే ఈ పందెం నెగ్గినట్లు యజమాని చెబుతున్నారు.

ఈ హోటల్​లో 50 రకాల పరోటాలు.. మూడు సైజుల్లో(సాధారణ, మధ్యస్థ, జంబో) తయారు చేస్తారు. అందులో బంగాళదుంప, కాలీఫ్లవర్​, ఉల్లిపాయ, ఆల్​ మిక్స్​ పరోటాలు ఉన్నాయి.

జంబో సైజులోని పరోటాలు రెండున్నర అడుగుల మేర ఉంటాయి. ఇందులో 2 కిలోల కుర్మా వేస్తారు. స్వచ్ఛమైన దేశీయ నెయ్యితో తయారు చేస్తారు. ఇక్కడ మీడియం పరోటా ధర రూ. 90, జంబో సైజు పరోటాలు రూ. 300లు ఆపైన ఉంటాయి. ఈ జంబో పరోటాలను ఐదుగురు తినొచ్చు.

" మా వద్ద అతిపెద్ద పరోటాలు తయారు చేస్తున్నాం. తపస్య నా కుమార్తె పేరు. కూతురు పేరు మీదే రెస్టారెంట్​ నడుపుతున్నా. పదేళ్ల క్రితం మన ఇళ్లలో చేసుకునే విధంగానే సాధారణ సైజ్​లోనే పరోటాలు తయారు చేసే వాళ్లం. ఒక సారి నా భార్యకు ఆరోగ్యం బాగాలేదని.. పరోటా తీసుకురమ్మని చెప్పింది. ఆ సమయంలో నా కుమార్తె వయసు ఒకటిన్నరేళ్లు. నేను పరోటాలు తీసి చూపించినప్పుడు నా కూతురు అవి చిన్నగా ఉన్నాయని.. పెద్దవి తయారు చేయమని చెప్పింది. అప్పటి నుంచి జంబో పరోటాలు చేస్తున్నాం."

- యజమాని, తపస్య హోటల్​.

ఈ పరోటాలు తినేందుకు చుట్టుపక్కల వారు మాత్రమే కాదు.. చాలా దూరం నుంచి ఇక్కడికి వస్తారు. నెయ్యి వేసి చేసిన రుచికరమైన పరోటాలు తిని అద్భుతంగా ఉన్నాయని చెబుతారు.

ఇదీ చూడండి: ప్రత్యక్ష రాజకీయాల్లోకి రష్మీ!