బరువు తగ్గించినందుకు 8 వారాల జైలు

నిజం ఎప్పటికైనా బయటపడాల్సిందే. తప్పు చేసి ఎన్ని రోజులు తప్పించుకున్నా... ఏదో రూపంలో మనల్ని వెంటాడుతుంది. ఇదే పరిస్థితి సింగపూర్​లో ఓ భారతీయుడికి ఎదురైంది. రెండేళ్లుగా అవినీతికి పాల్పడుతూ అనుకోని పరిస్థితిలో బుక్కయ్యాడు.

విమాన ప్రయాణికులను వేధించే సమస్య... లగేజీ. మన బ్యాగుల బరువు విమానయాన సంస్థలు నిర్దేశించిన పరిమితిలోపే ఉండేలా చూసుకోవడం పెద్ద సవాలే. పరిమితి కాస్త దాటినా... అదనంగా భారీ రుసుము చెల్లించాల్సిందే. ఈ ఇబ్బందినే అక్రమార్జనకు మార్గంగా ఎంచుకున్నాడో ప్రబుద్ధుడు. చివరకు కటకటాలపాలయ్యాడు.

ఇదీ కథ

సింగపూర్ ఛాంఘీ​ విమానాశ్రయంలో వినియోగదారుల సేవల విభాగంలో పని చేస్తున్నాడు హితేశ్ కుమార్ పటేల్. టైగర్​ ఎయిర్​వేస్​ ప్రయాణికుల లగేజీ నిర్ణీత బరువుకు లోబడి ఉందా లేదా అని పరీక్షించటం ఆయన విధి. ప్రయాణికుల అవసరాలను ఆసరాగా తీసుకున్న పటేల్​.. అధిక బరువును తక్కువగా చూపి లంచాలు తీసుకోవటం మొదలు పెట్టాడు.

లగేజీ అక్రమాల్లో భాగంగా గోపాల్​ కృష్ణ రాజుతో హితేశ్​కు పరిచయమైంది. సింగపూర్​లో బంగారం కొని, చెన్నైలో అమ్మడం రాజు ప్రవృత్తి. ఇందుకోసం చెన్నై వెళ్లేవారి సాయం తీసుకునేవాడు రాజు. వారి లగేజీలోనే బంగారం పంపేవాడు. ఇందుకు వారికి కొంత సొమ్ము ఇచ్చేవాడు.

లగేజీ బరువు తక్కువగా చూపేందుకు హితేశ్​కు లంచాలు ఇచ్చేవాడు రాజు. అప్పుడప్పుడూ డబ్బుతో పాటు భోజనమూ పెట్టించేవాడు. 2016 జనవరి-అక్టోబర్​ మధ్య వీరి బంధం రోజుకో లగేజీ- రెండు లంచాలు- మూడు భోజనాలు అన్నట్లు సాగింది.

వార్తతో తారుమారు

సింగపూర్​ విమానాశ్రయంలో లగేజీ విషయంలో అక్రమాలు జరుగుతున్నాయని గతేడాది జులై 13న ఓ పత్రిక కథనం ప్రచురించింది. విమానాశ్రయం అధికార యంత్రాంగం అంతర్గత విచారణ జరిపించింది. హితేశ్​ బాగోతం గుర్తించింది.

సీన్​ కట్​చేస్తే... లంచం తీసుకున్న నేరానికి హితేశ్​కు 8 వారాల జైలు శిక్ష, 800 సింగపూర్​ డాలర్ల జరిమానా విధించింది కోర్టు.

పటేల్​ తరహాలోనే బుక్కయిన మరో ఇద్దరు భారతీయులకూ గత వారమే శిక్ష వేసింది సింగపూర్​ కోర్టు.

ఇదీ చూడండి: చీమల పార్సిల్​ సీజ్​ చేసిన కస్టమ్స్ అధికారులు!