"ఆర్టికల్ 370 రద్దు చేస్తే.. అంతే" ఆర్టికల్ 370ను రద్దు చేయాలన్న కేంద్రమంత్రి అరుణ్జైట్లీ వ్యాఖ్యలపై పీడీపీ అధినేత్రి మెహబూబా ముఫ్తీ మండిపడ్డారు. అలా జరిగితే దేశానికి, జమ్ముకశ్మీర్ రాష్ట్రానికి మధ్య ఉన్న సంబంధం అంతటితోనే ముగిసిపోతుందని ఆమె హెచ్చరించారు.
"జమ్ముకశ్మీర్ పార్టీలకు తెలియాల్సి ఉంది. మనం ఎన్నికలకు ఏ రాజ్యాంగం ప్రకారం వెళ్తామో. ఆర్టికల్ 370 వల్లే భారత రాజ్యాంగం జమ్ముకశ్మీర్లో అమలవుతోంది. జమ్ముకశ్మీర్, భారత్ సంబంధాలు ఏ నిబంధనల ప్రకారం ప్రారంభమవుతాయి. నూతన నిబంధనలతో ప్రారంభిస్తే మళ్లీ వివాదాలు ప్రారంభమవుతాయి.. 370 ఆర్టికల్ను రద్దు చేస్తే భారత్తో కశ్మీర్ సంబంధాలు సైతం రద్దవుతాయి." - మెహబూబా ముఫ్తీ, పీడీపీ అధినేత్రి
ఆర్టికల్ 370 కేంద్రానికి, జమ్ముకశ్మీర్కు మధ్య వంతెన లాంటిదని ముఫ్తీ అన్నారు. అదే లేకపోతే తిరిగి సంప్రదింపులు ప్రారంభించాల్సి ఉంటుందని హెచ్చరించారు. భారత్తో జమ్ముకశ్మీర్ కొనసాగాలా వద్దా అని పునరాలోచన చేయాల్సి వస్తుందని అన్నారు.
"జైట్లీ ఒక విషయం అర్థం చేసుకోవాలి. ఇది చెప్పినంత సులువు కాదు. మీరు (కేంద్ర ప్రభుత్వం) ఆర్టికల్-370ను రద్దు చేస్తే, అంతటితో దేశానికి, రాష్ట్రానికి ఉన్న సంబంధాలు ముగిసినట్లే."
- మెహబూబా ముఫ్తీ, పీడీపీ అధినేత్రి
జమ్ముకశ్మీర్ ఆర్థిక అభివృద్ధికి ఆటంకంగా నిలుస్తున్న ఆర్టికల్ 370, ఆర్టికల్ 35-ఏలను రద్దు చేయాలని అరుణ్జైట్లీ ఇటీవల వ్యాఖ్యానించారు. ఈ అధికరణల వల్ల జమ్ముకశ్మీర్లో స్థిర ఆస్తులను ఇతర ప్రాంత ప్రజలు కొనడానికి, స్థిర నివాసం ఏర్పరుచుకోవడానికి వీలుపడదు.
