ఎఫ్​-16ను కూల్చింది నిజమే : భారత్

ఎఫ్-16ను భారత్​ కూల్చలేదని, అన్ని క్షేమంగా ఉన్నాయన్న అమెరికా పత్రిక కథనంపై భారత వైమానిక దళం స్పందించింది. ఫిబ్రవరి 27న పాక్ విమానాలు  భారత భూభాగంలోకి ప్రవేశించినపుడు వాటిలోని ఎఫ్-16 కూల్చివేశామని భారత వైమానిక దళం స్పష్టం చేసింది.

ఫిబ్రవరి 27న పాక్ విమానాలు భారత భూభాగంలోకి చొచ్చుకొచ్చిన ఘటనలో వాటిలోని ఎఫ్-16 విమానాన్ని కూల్చివేశామని స్పష్టం చేసింది భారత వైమానిక దళం. ఆ ఘటనలో ఎఫ్​-16 విమానం కూలలేదని, పాక్​ వద్ద ఉన్న అన్ని ఎఫ్​-16 విమానాలు క్షేమంగా ఉన్నాయన్న అమెరికా పత్రిక కథనంపై స్పందించింది. ఎఫ్-16 కూలినట్టు తమ వద్ద ఆధారాలున్నాయని, శకలాల్ని సైతం సేకరించినట్లు పేర్కొంది భారత వైమానిక దళం.

"సరిహద్దును రక్షించే క్రమంలో పాకిస్థాన్​కు చెందిన ఎఫ్​-16ను భారత వైమానిక దళానికి చెందిన మిగ్-21 బైసన్ ఎయిర్​క్రాఫ్ట్.. నౌషేరా సెక్టార్​లో కూల్చింది" -భారత వైమానిక దళం

వింగ్ కమాండర్ అభినందన్ వర్ధమాన్ ఈ ఎఫ్-16ను కూల్చినట్లు వెల్లడించింది. పాకిస్థాన్ రేడియో కమ్యూనికేషన్లు సైతం ఈ విషయాన్ని నిర్ధరించినట్లు పేర్కొంది. రెండు వేరు వేరు చోట్ల నుంచి క్షిపణులను విడుదల చేసిందని వెల్లడించిందిభారత వైమానిక దళం.

అమెరికా పత్రిక కథనం...

ఎఫ్​-16 యుద్ధ విమానాన్ని భారత్ కూల్చలేదన్న పాకిస్థాన్​ వాదనలకు బలం చేకూరేలా అమెరికాకు చెందిన 'ఫారిన్​ పాలసీ మ్యాగజైన్​' ఓ​ కథనం ప్రచురించింది. రక్షణ ఒప్పందంలో భాగంగా పాక్​కు అమెరికా అందించిన ఎఫ్​-16 యుద్ధ విమానాలన్నీ సురక్షితంగానే ఉన్నాయని కథనంలో పేర్కొంది.​ అమెరికా రక్షణ అధికారులు క్షేత్రస్థాయిలో పరిశీలించి దీన్ని ధ్రువీకరించారని తెలిపింది.

ఇదీ జరిగింది...

ఫిబ్రవరి 14న జరిగిన పుల్వామా ఉగ్రదాడికి భారత్​ ధీటుగా బదులిచ్చింది. బాలాకోట్​లోని పాక్​ ఉగ్ర శిబిరాలను వైమానిక దాడులతో నేలమట్టం చేసింది.
భారత సైనిక శిబిరాలే లక్ష్యంగా దాడికి యత్నించిన పాక్​ ఎఫ్​-16 యుద్ధ విమానాన్ని కూడా ధ్వంసం చేసినట్టు ఫిబ్రవరి 28న రక్షణ అధికారులు ప్రకటించారు.