కరోనా కష్టాలు: ఆతిథ్యమిచ్చే వారికే 'ఆసరా'కరవాయే! కరోనా కారణంగా కేరళ అలప్పుజలోని చిన్న తరహా రిసార్టులు, హోంస్టేలు(ఆతిథ్య గృహాలు) తీవ్ర సంక్షోభాన్ని ఎదుర్కొంటున్నాయి. ఇప్పటికే వరదలతో దెబ్బతిన్న రిసార్టు యజమానులపై కరోనా సంక్షోభం తీవ్రంగా పడింది. ఈ పరిస్థితుల నుంచి గట్టెక్కేలా ప్రభుత్వం సాయం అందించాలని వారు కోరుతున్నారు.
ఊహించని అతిథిగా కరోనా...
'తూర్పు వెనిస్'గా పిలిచే అలప్పుజలోని పర్యటక రంగంపై కరోనా తీవ్ర ప్రభావం చూపించింది. ఈ వేసవి సెలవుల్లో దేశ విదేశాల నుంచి వచ్చే పర్యటకులకు స్వాగతం పలికేందుకు సిద్ధమైంది అలప్పుజ. అయితే ఊహించని అతిథిగా కరోనా మహమ్మారి వచ్చి తిష్టవేసింది. వైరస్ కారణంగా పర్యటక రంగం పూర్తిగా దెబ్బతింది. ఫలితంగా వీటిపై ఆధారపడే రిసార్టులు, ఆతిథ్య గృహాల యజమానులు రోడ్డున పడ్డారు.
అలప్పుజలో ప్రస్తుతం కరోనా కేసులేవీ లేవు. అయితే దేశవ్యాప్తంగా మూడోదశ లాక్డౌన్ కొనసాగుతుండటం వల్ల.. పర్యటకులు ప్రయాణాలకు దూరంగా ఉంటున్నారు. ఫలితంగా వ్యాపారం మందగించిందని స్థానికులు వాపోయారు. ఈ పరిణామాలపై ఓ స్థానిక ఆర్థికవేత్త స్పందించారు.
"బ్యాంకులోన్ల సాయంతో కొంత మంది ఇళ్లు, రిసార్టులు నిర్మించారు. అవన్నీ వరదల కారణంగా దెబ్బతిన్నాయి. వాటిని పునరుద్ధరించేందుకు యజమానులు తమ వద్ద ఉన్నవన్నీ అమ్మేసుకోవాల్సి వచ్చింది. ఈ ఏడాదైనా వ్యాపారం సజావుగా సాగాలని వారు ఆశించారు. అయితే వీటన్నింటి మధ్య కరోనా వచ్చి ప్రజల జీవన స్థితిగతులపై ప్రభావం చూపించి.. జీవనోపాధి లేకుండా చేసింది. ప్రభుత్వ సాయం కోరుతూ ఇచ్చిన దరఖాస్తులకు ఇప్పటికీ సరైన స్పందన లభించలేదు" -ఆర్థికవేత్త
ప్రభుత్వం నుంచి సాయం కరవు!
ఇప్పటివరకు వరదల్లో దెబ్బతిన్న ఇళ్లకే ప్రభుత్వం ఆర్థిక సాయం అందించింది. హోంస్టేలు, రిసార్టులుగా నమోదైన వాటికి సాయం చేయాలని భావించినప్పటికీ.. ఆ ప్రతిపాదనను విరమించుకుందని స్థానికులు తెలిపారు.
సాయం చేయడంలోనే ఆనందం..
ఈ కష్టకాలంలో ఎటువంటి ఆదాయ వనరులు లేనప్పటికీ.. విదేశాల నుంచి తిరిగి వస్తున్న భారతీయులను క్వారంటైన్లో ఉంచేందుకు వీలుగా రిసార్టులను అందుబాటులో ఉంచడంలో సాయపడుతున్నారు ఆయా యజమానులు. మహమ్మారిపై పోరాడేందుకు రాష్ట్రానికి తమ వంతు సాయం చేయడానికి సిద్ధంగా ఉన్నామని వారంతా తెలిపారు. ఎలాగైనా ప్రభుత్వం తమ గోడు విని ఈ సంక్షోభం నుంచి తమను గట్టెక్కిస్తుందని ఆశాభావం వ్యక్తం చేశారు.
