హోలీరే హోలీ... భారతమంతా రంగుల మయం

రంగుల పండుగ హోలీని భారతీయులంతా ఘనంగా జరుపుకుంటున్నారు. దేశవ్యాప్తంగా భిన్న ప్రాంతాల ప్రజలు.. వారివారి సంప్రదాయాలు ఉట్టిపడే విధంగా హోలీ సంబరాల్లో మునిగితేలుతున్నారు.

హోలీ ఓ రంగుల పండుగ. 'కష్టసుఖాల సంగమమైన ఈ మానవ జీవితం సప్త వర్ణాల ఇంద్ర ధనస్సులా రంగులమయం కావాలని' ప్రజలు ఈ పండుగ జరుపుకుంటారు. చెడుపై మంచి సాధించిన విజయానికి గుర్తుగా హోలికా దహనం నిర్వహిస్తారు. బంధు, మిత్ర సమేతంగా వేడుకల్లో పాల్గొంటారు. ఒకరిపై ఒకరు రంగులు జల్లుకుని ఆనందంగా గడుపుతారు.

హోలీ పర్వదినాన దేశవ్యాప్తంగా ప్రజలు రంగుల పండుగ మహోత్సాహంగా జరుపుకుంటున్నారు. గుజరాత్​ సూరత్​ జిల్లా సరాస్​ గ్రామంలో స్థానిక ప్రజలు ఈ రంగుల పండుగ పురస్కరించుకుని హోలికా దహనం నిర్వహించారు. అనంతరం సంప్రదాయం ప్రకారం భక్తులు అగ్నిగుండంపై నడిచి తమ మొక్కులు తీర్చుకున్నారు.

ముంబయి వొర్లీ ప్రాంతంలో స్థానికులు వినూత్నంగా సంబరాలు చేసుకున్నారు. హోలికా దహనం బదులు జైషే మహ్మద్​ ఉగ్రవాద సంస్థ వ్యవస్థాపకుడు మసూద్​ అజార్​ దిష్టిబొమ్మను దహనం చేశారు.