సూక్ష్మ, చిన్న, మధ్య తరహా పరిశ్రమలకు (ఎంఎస్‌ఎంఈలు) నగదు సాయాన్ని తిరస్కరిస్తూ.. దేశ ఆర్థిక వ్యవస్థను కూలదోసేలా ప్రభుత్వం విధానాలు ఉన్నాయని కాంగ్రెస్ నేత రాహుల్ గాంధీ ఆరోపించారు. ఈ చర్యను డీమానిటైజేషన్ 2.0. గా అభివర్ణించారు రాహుల్.
కేంద్రం చర్య డీమానిటైజేషన్ 2.0. సంకేతమేనా: రాహుల్
లాక్డౌన్ కారణంగా మూతబడిపోతున్న ఎంఎస్ఎంఈలకు కేంద్రం తక్షణ నగదు సాయం చేయకుండా దేశ ఆర్థిక వ్యవస్థను పతనావస్థ స్థితికి చేర్చేలా చూస్తోందని కాంగ్రెస్ నేత రాహుల్ గాంధీ ఆరోపించారు. ఈ చర్యను డీమానిటైజేషన్ 2.0గా అభివర్ణించారు.
'కేంద్రం ఇలా చేయడం డీమానిటైజేషన్ 2.0. సంకేతమే'
దేశ ఆర్థిక వ్యవస్థ, ఎంఎస్ఎంఈ రంగాలపై కరోనా ప్రభావానికి సంబంధించి ఓ మీడియా సంస్థ విడుదల చేసిన నివేదికను రాహుల్ గాంధీ ట్విట్టర్‌లో షేర్‌ చేశారు. పేదలకు తక్షణ సాయం కింద రూ.10వేలు కేటాయించాలని, ఎంఎస్ఎంఈ పరిశ్రమకు ఆర్థిక ఉద్దీపన ప్యాకేజీని తీసుకురావాలని కాంగ్రెస్ నేత డిమాండ్ చేశారు.
గతంలోనూ ఈ విషయంపై ప్రభుత్వంపై విమర్శలు గుప్పించారు రాహుల్. ఎంఎస్ఎంఈలకు నగదు సాయం చేయకపోవడం నేరమని ఆరోపించారు. అంతేకాకుండా, వైరస్ వ్యాప్తిని అరికట్టేందుకు కేంద్రం లాక్డౌన్ను సమర్థవంతంగా అమలు చేయడంలో విఫలమైందని పేర్కొన్నారు.