ఆయన చెవిలో మారుమోగుతున్న 253 విదేశీ రేడియోలు!

మీకు రేడియో వినే అలవాటుందా? అయితే, ప్రయాణల్లో రేడియో ప్రసారాలు వింటున్నప్పుడు సిగ్నల్స్ పోతూ వస్తూ ఉండడం గమనించే ఉంటారు. నగరాలకు దూరంగా వెళ్లే కొద్ది ఆ ఛానల్ తరంగాలు మన చెవికి దూరమవుతున్నట్టు అనిపిస్తుంది. కొన్ని రేడియో ఛానళ్ల స్టేషన్లు మన దేశంలోనే ఉన్నా.. వాటి సిగ్నళ్లు ఒక్కోసారి మనదాకా అందవు. కానీ, బంగాల్​కు చెందిన ఓ పెద్దాయన మాత్రం ఏకంగా వివిధ దేశాలలోని 253 రేడియో స్టేషన్ల ప్రసారాలను రోజూ వింటున్నారు. అదెలా సాధ్యమైందో చూసేద్దాం రండి...

అరుదైన 'డీజింగ్' అలవాటుతో దాదాపు 253 విదేశీ రేడియో ప్రసారాలను వింటున్నారు బంగాల్, ఉత్తర 24 పరగణాల జిల్లాకు చెందిన ఓ పెద్దాయన.

ఉత్తర 24 పరాగణాలు, సుబర్ణపట్టణ్ ప్రాంతానికి చెందిన బాబుల్ గుప్తా (64)కు డీజింగ్ అలవాటుంది. అంటే, సుదూర రేడియో, టీవీ ప్రత్యక్ష ప్రసారాలను ఎలాగైనా వినాలని తపించే అలవాటన్నమాట. ఇందుకోసం ఓ గదిని మినీ రేడియో స్టేషన్​గా మార్చేశారు. మేడ మీద బోలెడు యాంటీనాలను ఏర్పాటు చేసుకున్నారు. ఈ వింత అలవాటుతోనే ప్రపంచంలోని దాదాపు 253 రేడియో స్టేషన్ల తరంగాలను వెతికిపట్టుకున్నారు. ఈ క్రమంలోనే ఓ అంటార్కిటికా రేడియో ఛానల్ సైతం బాబుల్ యాంటీనాకు చిక్కింది.

బాబుల్ రేడియో గది

ఎలా అలవాటైందంటే...

ఎక్కడో విదేశాల్లో ప్రసారమయ్యే రేడియో కార్యక్రమాలను వినాలనే తపన తమకు ఎందుకు కలిగిందని అడిగితే... 1968లో తనకు ఎదురైన ఓ సంఘటనను ఈటీవీ భారత్​తో పంచుకున్నారు బాబుల్.

ప్రపంచ రేడియో స్టేషన్లతో అనుసంధానం

"నాకప్పుడు 12 ఏళ్లు. ఓ రోజు వార్తా పత్రిక చదువుతున్నప్పుడు.. మెల్బోర్న్ ఒలంపిక్ క్రీడా కార్యక్రమం ఆ దేశ రేడియో బ్రాడ్ కాస్ట్ లో ప్రసారమవుతుందనే వార్త చూశాను. ఆ రోజు మా నాన్న రేడియో పట్టకుుని ఆ కార్యక్రమం వినాలని విశ్వ ప్రయత్నం చేశాను. కానీ, పత్రికలో వచ్చిన ఆ ఛానల్ సిగ్నల్ అందలో దొరకలేదు. యాంటీనాలను మార్చి సిగ్నల్ కోసం బాగా ప్రయత్నించాను. చివరికి.. మెల్బోర్న్ రేడియో స్టేషన్ సిగ్నల్ అందింది. అప్పటి నుంచి, వివిధ దేశాల రేడియో తరంగాలను వెతుక్కుంటూ వినేవాడిని."

-బాబుల్ గుప్తా

బాబుల్ జేబు ఖర్చులకు ఇచ్చే డబ్బును దాచుకుని.. సిగ్నల్​ను గ్రహించే యాంటీనాలు కొనేవారు. యాంటీనాల సాయంతో రష్యా , అమెరికా, జపాన్, బ్రిటన్, ఐరోపా వంటి దేశాల్లో ప్రసారమయ్యే రేడియో కార్యక్రమాలను వినగలుగుతున్నారు. ఇలానే ప్రయత్నించి అంతరిక్షంలోని రేడియో ప్రసారాలనూ వింటానంటున్నారు బాబుల్.

"ఏదో ఓ రోజు నేను అంతరిక్షం నుంచి ప్రసారమయ్యే రేడియో కార్యక్రమాలను వింటాను. ఆ దిశగా ప్రయత్నాలు మొదలుపెట్టాను. డీజింగ్ చేయడానికి ఆ దేశాల నుంచి అనుమతి పొందనక్కర్లేదు. అయితే, వాటిని ఉపయోగించి నాలా హెచ్ఏఎం రేడియోలను ప్రారంభించడానికి మాత్రం అనుమతి పొందాలి."

- బాబుల్ గుప్తా

తన అరుదైన అలవాటకు భార్య కుమారుల నుంచి పూర్తి సహకారమందుతోంది అంటున్నారు బాబుల్.

" పెళ్లయిన కొత్తలో మా ఆయన వింత అలవాటుకు నేను కాస్త ఇబ్బందిపడ్డాను. రాత్రింబవళ్లు ఆయన ఆ గదిలోనే ఉంటూ.. రేడియో సిగ్నళ్ల కోసం ప్రయత్నించేవారు. కానీ, మెల్లిగా ఆయన అలవాటును అర్థం చేసుకున్నాను. మా కుమారుడు కూడా ఈ మధ్య తండ్రిలాగే విదేశీ రేడియో సిగ్నళ్ల కోసం ప్రయత్నిస్తున్నాడు. "

- అపర్ణ, బాబుల్ సతీమణి

ఇదీ చదవండి:దేశంలోనే తొలి మహిళా అంబులెన్స్ డ్రైవర్!