మన పల్లెలు ఎప్పటికీ పట్టుకొమ్మలేనని మరోసారి రుజువైంది. పట్టణ ప్రాంతాల్లో కంటే గ్రామాల్లోనే వయో వృద్ధుల ఆర్థిక పరిస్థితి మెరుగ్గా ఉందని జాతీయ నమూనా సర్వే (ఎన్‌ఎస్‌ఎస్‌ఓ)లో వెల్లడైంది. ముఖ్యంగా తెలంగాణలోని గ్రామీణ ప్రాంతాల్లో 60 ఏళ్లకు పైబడిన వయోవృద్ధుల్లో 53 % పురుషులు, 24 % మంది మహిళలు ఆర్థికంగా స్వతంత్ర జీవనం గడుపుతున్నట్లు తేలింది. వయోవృద్ధుల ఆర్థిక, సామాజిక స్థితిగతులు గ్రామీణ, పట్టణ ప్రాంతాల్లో వేర్వేరుగా ఉంటున్నాయి. అది కూడా మహిళలు, పురుషుల స్థితి భిన్నంగా ఉన్నట్లు ఇటీవల నిర్వహించిన ఈ నమూనా సర్వే తేల్చి చెప్పింది. ఒంటరి వృద్ధుల సంఖ్య కూడా ఇక్కడ ఎక్కువగా ఉండడం విశేషం. గ్రామీణ వృద్ధుల్లో ఒంటరిగా ఉంటున్న పురుషుల సంఖ్యలో తెలంగాణ రెండో స్థానంలో ఉండగా మహిళల విషయంలో దేశంలో మూడో స్థానంలో నిలుస్తోంది.
- ఇక్కడి పట్టణ ప్రాంతాల్లోని పురుషుల్లో ఆర్థిక స్వాతంత్య్రం ఉన్నవారు గ్రామాల్లో కంటే 6% తక్కువగా ఉండగా మహిళల్లో కేవలం 2 % మందే ఆర్థికంగా ఎవరిమీదా ఆధారపడకుండా జీవిస్తున్నారు.
గ్రామీణ ప్రాంతాలతో పోలిస్తే ఇది 22 % తక్కువ. తెలంగాణ గ్రామీణ ప్రాంతాల్లోని వృద్ధుల్లో 10.4 % పురుషులు ఒంటరిగా జీవిస్తున్నారు. దేశంలో అండమాన్‌ నికోబార్‌ దీవులు (13.3 శాతం) తర్వాత ఇదే అధికం. జీవిత భాగస్వామితో ఉంటున్న పురుషులు 42.1 %, ఉమ్మడికుటుంబ సభ్యులతో కలిసి జీవిస్తున్నవారు 35.4 %, పిల్లలతో కలిసి ఉంటున్నవారు 12.1 %, ఇతర బంధువులతో ఉంటున్నవారు 0.1 % మంది ఉన్నారు.
- గ్రామీణ ప్రాంతాల్లో 23.4% మంది మహిళలు ఒంటరిగా జీవనం సాగిస్తున్నారు. దేశంలో డామన్‌ డయ్యూ (50 శాతం), లక్షద్వీప్‌ (33.9 శాతం) తర్వాత ఇదే అత్యధికం. ఇది పురుషులకంటే చాలా ఎక్కువ. అలాగే జీవిత భాగస్వామితో కలిసి ఉంటున్న మహిళల శాతం 18.5%, ఉమ్మడి కుటుంబ సభ్యులతో కలిసి జీవిస్తున్నవారు 7.5%, పిల్లలతో కలిసి ఉంటున్నవారు 37.1%, ఇతర బంధువులతో కలిసి ఉంటున్నవారు 13.6% మేర ఉన్నారు.
- తెలంగాణలోని పట్టణ ప్రాంతాల్లో పురుషులెవ్వరూ ఒంటరిగా లేరు. 18.5 % మంది జీవితభాగస్వామితో, 67.2% మంది ఉమ్మడి కుటుంబ సభ్యులతో, 12.1 % మంది పిల్లలతో, 2.2 % మంది ఇతర బంధువులతో ఉంటున్నారు. ఇక్కడ మహిళల విషయానికొస్తే 1.4 % మంది ఒంటరిగా ఉంటున్నారు. 6.2 % మంది జీవిత భాగస్వామితో, 50 % మంది ఉమ్మడి కుటుంబసభ్యులతో జీవిస్తున్నారు. 39.4 % మంది పిల్లలతో కలిసి ఉంటున్నారు. 3.1 % మంది ఇతర బంధువులతో జీవనం సాగిస్తున్నారు.
ఇదీ చూడండి:క్వారంటైన్ కేంద్రంలో 'మురళీ' గానం.. చిందేసిన రోగులు
