మహా భాజపా శాసనసభాపక్ష నేతగా మరోసారి ఫడణవీస్

మహారాష్ట్ర భాజపా శాసనసభా పక్షనేతగా మరోసారి దేవేంద్ర ఫడణవీస్​ ఎన్నికయ్యారు. ముంబయిలోని విధాన్​ భవన్​లో జరిగిన భాజపా శాసనసభాపక్ష సమావేశంలో ఎమ్మెల్యేలు ఈ నిర్ణయం తీసుకున్నారు.

మహారాష్ట్ర భారతీయ జనతా పార్టీ ఎమ్మెల్యేలు తమ నాయకుడిగా దేవేంద్ర ఫడణవీస్​ను మరోసారి ఎన్నుకున్నారు. ముంబయిలోని విధాన్​ భవన్​లో భేటీ అయిన నూతన శాసనసభ్యులు ఈ మేరకు నిర్ణయం తీసుకున్నారు.

ఈ సమావేశంలో ఇటీవలే ఎన్నికైన 105 మంది ఎమ్మెల్యేలు పాల్గొన్నారు. వీరితోపాటు కేంద్ర ప్రతినిధులుగా కేంద్రమంత్రి నరేంద్ర సింగ్ తోమర్, పార్టీ ఉపాధ్యక్షుడు అవినాశ్ రాయ్ ఖన్నా ఉన్నారు. ఫడణవీస్​ మినహా మరే పేరు పోటీకి రాలేదని, నాయకుడిగా ఆయననే ఎన్నుకున్నట్లు తోమర్​ ప్రకటించారు.

ఫడణవీస్ కృతజ్ఞతలు​

మరోసారి శాసనసభ పక్షనేతగా ఎన్నికైన ఫడణవీస్.. మిగిలిన వారికి కృతజ్ఞతలు తెలిపారు. శివసేన అధినేత ఉద్ధవ్​ ఠాక్రేకూ ధన్యవాదాలు చెప్పారు.

ప్రభుత్వ ఏర్పాటులో కీలక ప్రక్రియను పూర్తి చేసుకుంది భాజపా. ఇక శివసేనతో కొనసాగుతున్న ప్రతిష్టంభనను ఎలా ఎదుర్కోవాలో దృష్టి సారించే అవకాశం ఉంది. భాజపా ఎలాంటి వ్యూహాలను అనుసరించనుందోననే ఉత్కంఠ నెలకొంది.