పార్లమెంటరీ ప్యానెల్​ ముందుకు ఫేస్​బుక్​ ప్రతినిధి

సామాజిక మాధ్యమాల రాజకీయ పక్షపాతంపై వివాదం కొనసాగుతున్న తరుణంలో.. ఫేస్​బుక్​ ఇండియా చీఫ్ అజిత్ మోహన్ పార్లమెంటరీ ప్యానెల్ ముందు హాజరయ్యారు. భారత్​లో సామాజిక మాధ్యమాలపై కార్యకలాపాలపై కాంగ్రెస్ సీనియర్ నేత శశిథరూర్ నేతృత్వంలోని ప్యానెల్ విచారిస్తోంది.

సామాజిక మాధ్యమ దిగ్గజం ఫేస్​బుక్​ ఇండియా అధిపతి అజిత్ మోహన్​.. పార్లమెంటరీ ప్యానెల్​ ఎదుట​ బుధవారం హాజరయ్యారు. సామాజిక మాధ్యమాల దుర్వినియోగంపై చర్చలో భాగంగా ఆయనను పిలిచింది ఐటీ వ్యవహారాల శాఖ పార్లమెంటరీ స్టాండింగ్ కమిటీ​.

ఈ కమిటీకి కాంగ్రెస్ సీనియర్ నేత శశిథరూర్ నేతృత్వం వహిస్తున్నారు. దేశ ప్రజల వ్యక్తిగత గోప్యత, హక్కులు, సామాజిక మాధ్యమాల దుర్వినియోగంపై ప్రధానంగా చర్చించినట్లు తెలుస్తోంది. ఈ సమావేశానికి ఎలక్ట్రానిక్స్​, ఐటీశాఖ ప్రతినిధులను కూడా పిలిచింది ప్యానెల్.

భాజపా X కాంగ్రెస్..

విద్వేష వ్యాఖ్యల నిబంధనల నుంచి భాజపా నేతలను విస్మరించారని వచ్చిన వార్తా కథనాలపై ఫేస్​బుక్​ను ప్యానెల్​ విచారిస్తుందని శశిథరూర్​ ఇటీవలే ప్రకటించారు. దీనిపై భాజపా సభ్యులు తీవ్ర ఆగ్రహం వ్యక్తం చేశారు. రాజకీయ అజెండా కోసం కాంగ్రెస్ పార్టీ.. ప్యానెల్​ను ఉపయోగించుకుంటోందని ఆరోపించారు భాజపా ఎంపీ నిశాంక్ దుబే. ఆయనను ఛైర్మన్​ పదవి నుంచి తొలగించాలని డిమాండ్ చేశారు.

ఇదీ చూడండి:ఫేస్​బుక్​, వాట్సాప్​పై దర్యాప్తునకు రాహుల్ డిమాండ్