'రామమందిరంపై భాజపాకు పేటెంట్​ హక్కేం లేదు'

అయోధ్యలో రామ మందిర భూమిపూజ కార్యక్రమంలో పాల్గొనేందుకు ఎదురుచూస్తున్నట్లు చెప్పారు భాజపా నేత ఉమాభారతి. బాబ్రీ ఘటనలో తాను గతంలో చెప్పిన విషయానికే కట్టుబడి ఉన్నట్లు స్పష్టం చేశారు. ఈటీవీ భారత్​తో ప్రత్యేకంగా మాట్లాడిన ఉమ.. ఆలయ నిర్మాణానికి మద్దతిచ్చిన వారందరికీ ఇది ముఖ్యమైన సందర్భమని చెప్పారు.

ఆగస్టు 5న అయోధ్యలో జరగనున్న రామ మందిర భూమిపూజ కార్యక్రమంలో పాల్గొనేందుకు అత్యంత ఆసక్తిగా ఎదురుచూస్తున్నట్లు మధ్యప్రదేశ్​ మాజీ ముఖ్యమంత్రి, భాజపా నేత ఉమా భారతి పేర్కొన్నారు. రామ మందిర భూమి పూజ కార్యక్రమానికి నిర్ణయించిన ముహూర్తంపై వస్తున్న భిన్న వాదనల్ని కొట్టిపారేశారు.

రాముడికి సంబంధించిన ప్రతి అంశం పవిత్రమైనదని, ఈ కార్యక్రమాలపై ఎలాంటి అనుమానాలు అక్కర్లేదని స్పష్టం చేశారు ఉమ. తాను ఈ కార్యక్రమంలో పాల్గొన్నా, లేకపోయినా.. రామ మందిర నిర్మాణానికి శంకుస్థాపన జరగడం ముఖ్యమని పేర్కొన్నారు.

ఈటీవీ భారత్​తో ప్రత్యేకంగా మాట్లాడిన ఉమా భారతి... ఐదు శతాబ్దాల పోరాటానికి ఫలితం దక్కడం చాలా గర్వకారణమన్నారు. మందిరం నిర్మించాలన్న సుప్రీం తీర్పును అందరూ స్వాగతించారని గుర్తు చేశారు. భాజపాకే కాకుండా ఆలయ నిర్మాణానికి మద్దతిచ్చినవారందరికీ ఇది ముఖ్యమైన సందర్భమని చెప్పారు.

'బాబ్రీ విషయంలో కట్టుబడే ఉన్నా'

బాబ్రీ ఘటనలో తన హస్తం ఉందని ఉమా భారతి బహిరంగంగానే ఒప్పుకున్నారు. ఈ కేసులో ఉమా భారతి విచారణ ఎదుర్కొంటున్నారు. ఆ సమయంలో డిసెంబర్ 1 నుంచి డిసెంబర్ 6 వరకు అయోధ్యలోనే ఉన్నానని మరోసారి స్పష్టం చేశారు ఉమా భారతి. ఈ విషయంలో వెనకడుగు వేసేది లేదన్నారు.

"గతంలో నేనేదైతే చెప్పానో దానికి కట్టుబడి ఉన్నాను. ఉద్యమం సమయంలో నేను చావడానికైనా సిద్ధమయ్యాను. చాలా సార్లు కాల్పులను ఎదుర్కొన్నాను. రామ మందిర ఉద్యమానికి ముందే నా రాజకీయ జీవితాన్ని ప్రారంభించాను. మందిర నిర్మాణం కోసం నా రాజకీయ జీవితాన్ని త్యాగం చేయడంలో ఎలాంటి బాధ లేదు."

-ఉమా భారతి, మధ్యప్రదేశ్​ మాజీ ముఖ్యమంత్రి

రామమందిరం నిర్మించిన తర్వాత దేశ ప్రజలందరిలో సామరస్యం పెరుగుతుందని అన్నారు ఉమా. రాముడు భాజపాకు చెందినవాడు కాదని.. ప్రతి ఒక్కరికీ సొంతమేనని చెప్పారు. అదే విధంగా ఎవరైనా సరే హిందూత్వను తన సొంతంగానే భావించవచ్చని పేర్కొన్నారు. కాశీ, మథుర అయోధ్యతో పోలిస్తే భిన్నమని.. ఈ మందిరాలపై నిర్ణయం తీసుకోవడానికి ఎలాంటి సమస్య ఉండదని అభిప్రాయం వ్యక్తం చేశారు.

ప్రధానమంత్రి నరేంద్ర మోదీ సైతం రామ మందిర భూమి పూజ కార్యక్రమంలో పాల్గొనున్నారు. అయితే రామ మందిర ఉద్యమంలో పాల్గొన్న వ్యక్తుల్లో ఎంతమంది ఈ కార్యక్రమానికి హాజరవుతారన్న దానిపై స్పష్టత లేదు.

ఇదీ చదవండి-అయోధ్య రామాలయం భూమిపూజ ఇలా...