ఫిబ్రవరి 7 ఆదివారం ఉదయం ఉత్తరాఖండ్లో పెనుప్రమాదం సంభవించింది. నందాదేవీ హిమానీనదం జలవిలయం సృష్టించింది. ధౌలిగంగా నది ఉప్పొంగి ప్రవహించింది. ఫలితంగా జోషిమఠ్లో వరదలు సంభవించాయి. రైని గ్రామం సహా తపోవన్ ప్రాజెక్టు పూర్తిగా ధ్వంసమైంది. ఆరోజు జరిగిన ఈ భయానక దృశ్యాలను ప్రత్యక్షంగా చూశాడు మన్వర్ సింగ్. ఆ దృశ్యాలను వీడియో తీసి సామాజిక మాధ్యమాల్లో షేర్ చేసి ప్రజలు, అధికారులను అప్రమత్తం చేశాడు. అతనితో ఈటీవీ భారత్ ప్రత్యేకంగా మాట్లాడింది. అసలు ఆరోజు ఏం జరిగిందో స్వయంగా అతని మాటల్లోనే తెలుసుకుందాం.
" ఆరోజు ఆఫీస్లో సమావేశంలో పాల్గొనేందుకు నేను వెళ్తున్నాను. ఉదయం 10.39 గంటలకు కొంత మంది అరుపులు వినిపించాయి. ఏదైనా బండరాయి జారిపడిందేమో అనుకున్నా. కానీ కొండలవైపు చూస్తే వరద ఉప్పొంగి ప్రవహిస్తుండటం గమనించా. ఆ ప్రవాహం చూసి వెంటనే జిల్లా విపత్తు అధికారికి ఫోన్ చేశా. ఆయన ఫోన్ కలవలేదు. వెంటనే ఆ విధ్వంస దృశ్యాలను ఫేస్బుక్ లైవ్లో పోస్ట్ చేశా. వరదల కారణంగా ధౌలిగంగా నది ఉప్పొంగి ప్రవహించి తపోవన్ ప్రాజెక్టు ధ్వంసమైన విషయాన్ని తెలియజేశా. ఈ ప్రమాదం గురించి శ్రీనగర్, చమోలి, కర్ణప్రయాగ్లోని నా మిత్రులకు సమాచారం అందించా. ఆయా ప్రాంతాల్లోని అధికారులను అప్రమత్తం చేయాలని చెప్పా. అనంతరం రైని గ్రామానికి చేరుకున్నా. అక్కడి విధ్వంసం చూసి ఒళ్లు జలదరించింది. రిషిగంగ ప్రాజెక్టు, నీతి బ్రిడ్జ్ పూర్తిగా ధ్వంసమయ్యాయి."
-మన్వర్ సింగ్, రైని గ్రామస్థుడు