అరకొర ఔషధాలు, పీపీఈలతోనే కరోనాపై పోరు

కరోనా విజృంభిస్తోంది. ఏ దేశం చూసినా కేసుల సంఖ్య అంతకంతకూ పెరిగిపోతోంది. మరి వైద్య వ్యవస్థ పరిస్థితి ఏంటి? సరిపడా మానవ వనరులు, ఔషధాలు, పరికరాలు ఉన్నాయా?

ప్రపంచవ్యాప్తంగా కరోనా కేసుల సంఖ్య పెరుగుతున్న నేపథ్యంలో వైద్య పరికరాలు, ఔషధాల నిల్వలు తరిగిపోతున్నాయి. ముఖ్యంగా వైరస్ ప్రభావం ఎక్కువగా ఉన్న అమెరికా వంటి అగ్రదేశంలోనూ ఇదే పరిస్థితి నెలకొంది.

అత్యవసర పరిస్థితుల్లో వినియోగించే మందుల కొరత అమెరికాలో తీవ్రంగా ఉన్నట్లు అనేక నివేదికలు చెబుతున్నాయి. ప్రధానంగా సెడేటరీ డ్రగ్స్.. అల్ బ్యూటరాల్, ఫెంటానైల్, మిడాజోలమ్, ప్రోపొఫోల్, వాసోప్రెజర్స్ కు డిమాండ్ అధికంగా ఉంది.

"వెంటిలేటర్​కు సహకారంగా వాడే మందులకు 95 శాతం ఆర్డర్లు పెరిగాయి. అయితే గత నెలలోనే వీటి లభ్యత 60 నుంచి 70 శాతం తగ్గింది. అమెరికాలో 3 వేల ఆసుపత్రులతో ఒప్పందాలపై చర్చిస్తోన్న విజియెంట్ గ్రూప్ వైస్ ప్రెసిడెంట్ ఈ విషయాన్ని చెప్పారు."

- మెడ్ స్కేప్ మెడికల్ న్యూస్

పోర్ట్ లాండ్ విశ్వవిద్యాలయం వైద్యుడు ఎస్తర్ చూ మాటలు పరిస్థితి తీవ్రతను తెలియచెబుతున్నాయి.

"కొన్ని ఔషధాలు లేకుండా వెంటిలేటర్లను వినియోగించలేం. కానీ ఆసుపత్రులన్నీ ఈ మందుల కొరతతో ఇబ్బందులు ఎదుర్కొంటున్నాయి. వ్యాధి భారీ తీవ్రతకు చేరకముందే ఈ పరిస్థితి ఉంది."

-ఎస్తర్ చూ, పోర్ట్ లాండ్ విశ్వవిద్యాలయం

కరోనాకు చికిత్స అందించే విషయంలో 15 రకాల ఔషధాల కొరత ఉన్నట్లు నార్త్ కరోలినాలోని ప్రీమియర్ ఆరోగ్య సంస్థ వెల్లడించింది. ముఖ్యంగా కరోనాతో భారీగా ప్రభావితమైన న్యూయార్క్ లో ఈ సమస్య తీవ్రంగా ఉందని తెలిపింది.

"సెడెటివ్ డ్రగ్.. అల్ బ్యూటరాల్ ఆర్డర్లు 1,870 శాతం పెరిగాయి. కానీ ప్రస్తుత వ్యవస్థ ఈ డిమాండ్​ను చేరుకోలేకపోతోంది. మార్చిలో ఫెంటానైల్ డిమాండ్ న్యూయార్క్ లో 533శాతం పెరిగింది. అయితే ఇందులో 63 శాతం ఆర్డర్లు మాత్రమే అందాయి."

- ప్రీమియర్ నివేదిక

భారత్​లో పరిస్థితి ఇదీ..

కరోనాపై పోరాటం చేస్తోన్న భారత్​లోనూ మందుల కొరత ఏర్పడేందుకు ఎంతో సమయం పట్టదని నివేదికలు చెబుతున్నాయి. ఇప్పటికే ఎయిమ్స్ డైరెక్టర్​కు రెసిడెంట్ డాక్టర్స్ అసోసియేషన్ (ఆర్డీఏ) ఔషధాల కొరతపై లేఖ రాసింది.

వ్యక్తిగత సంరక్షణ పరికరాలైన సర్జికల్ మాస్కులు, గ్లోవ్స్ తగినంతగా లేవని ఆందోళన వ్యక్తం చేసింది. పీపీఈల కొరతపై చాలామంది వైద్యులు సామాజిక మాధ్యమాల్లో ప్రధానంగా చర్చిస్తున్నారు.

ఎగుమతులతో..

దేశంలో ఈ పరికరాల కొరత ఉన్నప్పటికీ కొన్ని వస్తువులను కొన్ని రోజుల క్రితం వరకు విదేశాలకు ఎగుమతి చేసింది భారత ప్రభుత్వం. 2020 ఫిబ్రవరి 27న పరికరాలను నిల్వ చేసుకోవాల్సిన అవసరం ఉందని అన్ని దేశాలకు ప్రపంచ ఆరోగ్య సంస్థ సూచించినా ఖాతరు చేయలేదని పలువురు విమర్శిస్తున్నారు.

ఇదీ చూడండి:ఆ ఔషధం ఎగుమతులపై నిషేధం పాక్షికంగా ఎత్తివేత!