'డీకేకు కొత్త చిక్కులు.. కుమార్తెకు ఈడీ సమన్లు'

కర్ణాటక మాజీ మంత్రి, కాంగ్రెస్​ సీనియర్​ నేత శివకుమార్​కు ఇప్పట్లో ఇబ్బందులు తప్పేలా లేవు. మనీలాండరింగ్​ కేసులో ఆరోపణలు ఎదుర్కొంటున్న వేళ.. విచారణ నిమిత్తం ఆయన కుమార్తెకు ఎన్​ఫోర్స్​మెంట్​ డైరెక్టరేట్​ సమన్లు జారీ చేసింది. భాజపా ప్రతీకార రాజకీయాలకు పాల్పడుతోందని విమర్శించారు డీకే.

మనీలాండరింగ్​ కేసులో అరెస్టయిన కర్ణాటక​ మాజీ మంత్రి, సీనియర్​ నేత డీకే శివకుమార్​కు కొత్త చిక్కులొచ్చిపడ్డాయి. ఈ కేసులో విచారణ నిమిత్తం తాజాగా ఆయన కూతురు ఐశ్వర్యకు సమన్లు జారీ చేసింది ఎన్​ఫోర్స్​మెంట్​ డైరెక్టరేట్​. సెప్టెంబర్​ 12న దిల్లీలోని ఈడీ కార్యాలయానికి హాజరుకావాలని పేర్కొన్నారు అధికారులు.

2017లో తన కుమార్తెతో కలిసి సింగపూర్​ పర్యటనకు వెళ్లినట్లుగా శివకుమార్​ చేసిన వ్యాఖ్యలపై ఆమెను ప్రశ్నించనున్నారు. పర్యటన వివరాలను సేకరించనున్నారు. పీఎంఎల్​ఏ (మనీ లాండరింగ్​ నిరోధక చట్టం) కింద ఆమె వాంగ్మూలాన్ని నమోదు చేయనుంది ఈడీ.

పన్ను ఎగవేత, హవాలా లావాదేవీల విషయంలో.. శివకుమార్‌ను సెప్టెంబర్​ 3న ఎన్​ఫోర్స్​మెంట్​ డైరెక్టరేట్​ అధికారులు అరెస్టు చేయగా, ప్రస్తుతం ఆయన ఈడీ కస్టడీలోనే ఉన్నారు.

చట్టబద్ధంగా విజయం సాధిస్తా: డీకే

భాజపా ప్రభుత్వంపై విరుచుకుపడ్డారు కాంగ్రెస్​ నేత డీకే శివకుమార్​. అధికార పార్టీ ప్రతీకార రాజకీయాలకు పాల్పడుతోందని ఆరోపించారు. తాను చట్టబద్ధంగా, రాజకీయంగా విజయం సాధిస్తానని ధీమా వ్యక్తం చేశారు. ఈ మేరకు ఆయన ట్విట్టర్​లో పేర్కొన్నారు. తనకు అండగా ఉంటున్న పార్టీ కార్యకర్తలు, మద్దతుదారులకు కృతజ్ఞతలు తెలిపారు. సాధారణ ప్రజలకు ఎలాంటి ఇబ్బందులు తలెత్తకుండా.. బెంగళూరులో బుధవారం శాంతియుత నిరసనలు చేయాలని వ్యాఖ్యానించారు.

ఇదీ చూడండి:నిమజ్జనంలో విషాదం... ఆరుగురు చిన్నారులు మృతి