'మోదీ చేసిన ధైర్యం గత ప్రధానులెవరూ చేయలేదు'

56 అంగుళాల ఛాతీ గల మోదీ లాంటి ధైర్యవంతులైన ప్రధాని గతంలో ఎవరూ లేరని వ్యాఖ్యానించారు భాజపా అధ్యక్షుడు అమిత్​ షా. తమ ప్రభుత్వం భారతదేశ సత్తాను ప్రపంచానికి చాటుతుందన్నారు. మోదీ హయాంలో చారిత్రక నిర్ణయాలు తీసుకున్నారని ఉద్ఘాటించారు.

మహారాష్ట్ర శాసనసభ ఎన్నికల ప్రచారంలో పాల్గొన్న కేంద్ర హోంమంత్రి, భాజపా అధ్యక్షుడు అమిత్ షా.. ప్రధాని మోదీని పొగడ్తలతో ముంచెత్తారు. కోల్హాపుర్​ జిల్లాలో ఏర్పాటు చేసిన ఓ సభలో ప్రసంగించిన ఆయన, 56 అంగుళాల ఛాతీ గల మోదీ చేసిన సాహసాలు గతంలో ఎవ్వరూ చేయలేదని వ్యాఖ్యానించారు.

"ఎన్నో ప్రభుత్వాలు వచ్చాయి. ఎందరో ప్రధానులు వచ్చి వెళ్లారు. వారిలో ఆర్టికల్​ 370 రద్దు చేసే ధైర్యం ఎవరూ చేయలేదు. కానీ, 56 అంగుళాల ఛాతీ గల మోదీ మాత్రమే ఆ పని చేయగలిగారు. దేశ ప్రగతిని ప్రపంచానికి చాటుతున్న ఏకైక ప్రధాని మోదీ. మేము ముమ్మారు​ తలాక్​ను తొలగించాం, కాంగ్రెస్ విరోధించింది. పుల్వామా దాడికి సమాధానంగా మోదీ పాకిస్థాన్​ ఇంట్లోకి ధైర్యంగా చొరబడి సర్జికల్​ స్ట్రైక్​ చేసి ఉగ్రవాదులకు బుద్ధి చెప్పారు."

-అమిత్​ షా, భాజపా అధ్యక్షుడు

ఈ సభలో మహారాష్ట్ర ప్రభుత్వం చేపట్టిన 'జల్​యుక్తా శివార్'​ను షా అభినందించారు. అనంతరం కోల్హాపుర్​లోని శ్రీ అంబాబాయి మహాలక్ష్మి ఆలయానికి వెళ్లారు. అమ్మవారిని దర్శించుకున్నారు. ఆలయ నిర్వాహకులు ఆయనకు లక్ష్మీ దేవి చిత్రపటాన్ని బహుకరించారు.

ఇదీ చూడండి:ఆర్టికల్ 370పై విపక్షాలకు మోదీ సవాల్​