యువతను మత్తుకు దూరంగా ఉంచి.. ఆరోగ్యకర భారతావనిని నిర్మించేందుకే ఈ-సిగరెట్లపై నిషేధం విధించినట్లు ప్రధాని మోదీ స్పష్టం చేశారు. ధూమపానాన్ని దూరం చేసేందుకు దేశ ప్రజలంతా కలిసి రావాలని పిలుపునిచ్చారు.
ఈ-సిగరెట్లపై తక్కువ అవగాహన ఉన్నందున ప్రజలకు వాటివల్ల కలిగే అనర్ధాల గురించి తెలియడం లేదని మన్-కీ-బాత్ ప్రసంగంలో వివరించారు ప్రధాని. ఈ-సిగరెట్ల తయారీలో హానికర రసాయనాలను వినియోగిస్తున్నా.. నేటితరం యువత వాటిని ఫ్యాషన్ కోసం కాల్చుతున్నారన్నారు మోదీ.
"భారత ప్రభుత్వం ఈ-సిగరెట్లపై నిషేధం విధించిన సంగతి మీకందరికీ తెలుసు. ఎలక్ట్రానిక్ పరికరాలతో తయారైన ఈ-సిగరెట్లు.. సాధారణ సిగరెట్లకు భిన్నంగా ఉంటాయి. సాధారణ సిగరెట్లలో వచ్చే పొగ, దుర్వాసన వీటిలో రాకుండా ఉండేందుకు కొన్ని సుగంధ ద్రవ్యాలను వీటి తయారీలో వినియోగిస్తారు. ఈ-సిగరెట్లలో నికోటిన్ను కలిగిన ద్రవపదార్థాన్ని వెలిగించినప్పుడు దాని నుంచి వచ్చే పొగ.. రసాయనాలతో నిండి ఉంటుంది. తద్వారా వినియోగదారులు నికోటిన్ను తీసుకుంటున్నట్లు అవుతోంది. "
-నరేంద్ర మోదీ, ప్రధాన మంత్రి
పొగాకు వినియోగంపైనా ప్రసంగించారు మోదీ. పొగాకుకు బానిసగా మారడం ఎంతో హానికరమని ప్రజలను హెచ్చరించారు.
"పొగాకును వినియోగిస్తున్నవారికి క్యాన్సర్, డయోబెటిస్, రక్తపోటు వంటి వ్యాధులు సోకేందుకు ఎక్కువ అవకాశముంది. పొగాకులో నికోటిన్ ఉండటం వల్ల అది మనకు హాని చేస్తుంది. కౌమారదశలో బుద్ధి ఎదుగుదలపై ఇది ప్రభావం చూపుతుంది."
-నరేంద్ర మోదీ, ప్రధాన మంత్రి