జమ్ములో విషాద ఘటన చోటుచేసుకుంది. కుటుంబ కలహాలతో భార్యను కాల్చి చంపి తానూ ఆత్మహత్య చేసుకున్నాడో సీఆర్పీఎఫ్ జవాను. ఈ ఘటనలో అతని భార్య చెల్లెలికి తీవ్రగాయాలయ్యాయి.
ఇదీ జరిగింది..
జమ్ము హెడ్క్వార్టర్లో విధులు నిర్వర్తిస్తున్నాడు సీఆర్పీఎఫ్ కానిస్టేబుల్ మదన్ సింగ్ (38). కొద్ది రోజులుగా అతని భార్య దీప్తి రాణి (35)తో గొడవలు జరుగుతున్నాయి. నిన్న నగర శివారు ఘరోటా ప్రాంతం రాజోర్లోని తన చెల్లి ఇంటికి దీప్తి వెళ్లింది. భార్యపై కోపం పెంచుకున్న మదన్.. శనివారం రాత్రి సర్వీసు రివాల్వర్ తీసుకుని క్యాంపు నుంచి నేరుగా మరదలి ఇంటికి చేరుకున్నాడు.
రాత్రి 10.30 గంటల సమయంలో భార్య తలుపు తీసే క్రమంలోనే కాల్పులకు పాల్పడ్డాడు. దీప్తి అక్కడికక్కడే ప్రాణాలు కోల్పోయింది. తన కూతురిని చంపాలని కాల్పులు చేయగా అక్కడి నుంచి తను పారిపోయింది. ఈ ఘటనలో దీప్తి చెల్లికి తూటాలు తగిలినట్లు అధికారులు తెలిపారు. అయితే.. చిన్నారికి ఎలాంటి గాయాలు కాలేదని చెప్పారు పోలీసులు.
భార్య మృతదేహం వద్దే సింగ్ కాల్చుకుని ఆత్మహత్య చేసుకున్నట్లు తెలిపారు. శవపరీక్ష కోసం మృతదేహాలను ఆసుపత్రికి తరలించారు. గాయాలపాలైన మహిళను చికిత్స చేస్తున్నారు. ఈ ఘటనపై శాఖాపరమైన దర్యాప్తు చేపట్టింది సీఆర్పీఎఫ్.
ఇదీ చూడండి: దిల్లీ అల్లర్ల ఛార్జిషీట్- ఏచూరిపై అభియోగాలు
