కేంద్ర ఆరోగ్య శాఖ 'హోం ఐసోలేషన్' మార్గదర్శకాలను సవరించింది. చాలా మందిలో కరోనా పాజిటివ్గా తేలిన లక్షణాలు కనిపించకపోవటం వల్ల కొత్త నిబంధనలను గురువారం విడుదల చేసింది. తేలికపాటి, ముందస్తు కరోనా లక్షణాలు కనిపించే రోగుల జాబితాలో అసింప్టోమేటిక్ (లక్షణాలు కనిపించని) వారిని చేర్చింది.
అయితే హెచ్ఐవీ, అవయవ మార్పిడి చేసుకున్నవారు, కేన్సర్ చికిత్స తీసుకునేవారు.. స్వీయ నిర్బంధానికి అర్హులు కాదని ఆరోగ్య శాఖ స్పష్టం చేసింది. మరికొందరి విషయంలో వైద్యులు పర్యవేక్షించి సిఫార్సు చేస్తేనే హోం ఐసోలేషన్కు అనుమతిస్తారు.
ఈ జాబితాలో..
- 60 ఏళ్ల పైబడిన వారు
- రక్తపోటు, చక్కెర వ్యాధి, గుండె సంబంధిత వ్యాధులు
- ఊపిరితిత్తులు, కాలేయం, మూత్ర పిండాల దీర్ఘకాలిక సమస్యలతో బాధపడేవారు
- సెరెబ్రో వస్క్యులర్ (మెదడు సంబంధిత) వ్యాధితో బాధపడుతున్నవారు వైద్యుల అనుమతితోనే హోం ఐసోలేషన్లో ఉండవచ్చు.
హోం ఐసోలేషన్లో ఉన్న రోగులను లక్షణాలు ప్రారంభమైన 10 రోజుల తర్వాత డిశ్ఛార్జి చేసే అవకాశం ఉంది. మూడు రోజులు జ్వరం లక్షణాలు తగ్గిపోతే మళ్లీ నిర్ధరణ పరీక్షలు లేకుండానే ఈ నియమం వర్తిస్తుంది. ఆ తర్వాత వారంపాటు తమ ఆరోగ్యం పట్ల స్వీయ పర్యవేక్షణ అవసరం ఉంటుందని కొత్త మార్గదర్శకాలు చెబుతున్నాయి.
కావాల్సిన ఏర్పాట్లు..
- తమ ఇంట్లో హోం ఐసోలేషన్కు తగిన ఏర్పాట్లు ఉంటేనే ఇందుకు అధికారులు అనుమతిస్తారు.
- రోగిని పర్యవేక్షించే వ్యక్తి 24 గంటలు అందుబాటులో ఉండాలి. నిత్యం ఆసుపత్రి సిబ్బందితో ఎప్పటికప్పుడు రోగి వివరాలు అందించాలి.
- రోగిని చూసుకునే వ్యక్తితోపాటు సన్నిహితంగా ఉన్నవారు హైడ్రాక్సీక్లోరోక్విన్ ఔషధాన్ని తీసుకోవాలి.
- ఆరోగ్య సేతు యాప్ను మొబైల్లో ఇన్స్టాల్ చేసుకుని ఎల్లవేళలా యాక్టివ్(బ్లూటూత్ లేదా వైఫై ద్వారా)గా ఉంచాలి.
- రోగులు తమ ఆరోగ్య పరిస్థితిని ఎప్పటికప్పుడు గమనిస్తూ జిల్లా నిఘా అధికారికి నివేదించాలి. అనారోగ్యం తీవ్రమైతే వెంటనే వైద్య సహాయాన్ని పొందాలి.
- అధికారులు నిర్దేశించిన కాలంపాటు కఠినంగా గృహ నిర్బంధంలో ఉంటానని స్వచ్ఛందంగా హామీ ఇవ్వాలి.
- హోం ఐసోలేషన్లో ఉన్నవారిని క్షేత్ర స్థాయి అధికారులు.. రోజూ వెళ్లి శరీర ఉష్ణోగ్రత, హృదయ స్పందన, రక్తంలో ఆక్సిజన్ స్థాయులను నమోదు చేసుకోవాలి.
- ఈ వివరాలన్నీ కొవిడ్- 19 పోర్టల్ అండ్ ఫెసిలిటీ యాప్లో అప్డేట్ చేయాలి.
ఇదీ చూడండి:కరోనా బాధితుల పర్యవేక్షణకు బుల్లి పరికరం
