దేశంలో వేగంగా వ్యాప్తి చెందుతోన్న కోరనాపై కాంగ్రెస్ అధ్యక్షురాలు సోనియా గాంధీ స్పందించారు. ఈ వైరస్ కారణంగా ప్రజలెవ్వరూ భయాందోళనలు చెందొద్దన్నారు. ఈ మహమ్మారి తీవ్ర అందోళన కలిగిస్తోందని, ఎందరో జీవితాలను ప్రమాదంలోకి నెడుతోందని.. లక్షలాదిమంది జీవనోపాధిపై తీవ్ర ప్రభావం చూపుతోందని ఆవేదన వ్యక్తం చేశారు. ఈ సవాలను ధైర్యంగా అధికమించగలమని నమ్ముతున్నట్లు ధీమా వ్యక్తం చేశారు సోనియా.
బాధితులకు అండగా...
కరోనా బాధితులకు అండగా నిలబడేలా కొన్ని చర్యలను చేపట్టాలని ప్రభుత్వానికి సూచించారు సోనియా. ఆర్థికంగా కుంగిపోయిన వారికి మద్దతుగా నిలిచేందుకు రంగాల వారీగా ఉపశమన ప్యాకేజీలను ప్రకటించాల్సిన అవసరం ఉందని అభిప్రాయపడ్డారు.
దేశవ్యాప్తంగా కరోనా వైద్య పరీక్షా కేంద్రాలను మరింత పెంచాలని, ప్రత్యేక వెబ్సైట్ల ద్వారా ఆసుపత్రులు, వైద్య సదుపాయాల వివరాలను ప్రజలకు తెలియజేయాలని ప్రధాని మోదీకి విజ్ఞప్తి చేశారు.