'సంక్షోభానికి కాంగ్రెస్​- జేడీఎస్ అంతర్గత కలహాలే కారణం'

కర్ణాటకలో తలెత్తిన రాజకీయ సంక్షోభానికి అధికార కాంగ్రెస్​-జేడీఎస్ కూటమిలో అంతర్గత కలహాలే కారణమని భాజపా విమర్శించింది. ప్రభుత్వాన్ని కూల్చేందుకు భాజపానే ప్రయత్నిస్తోందన్న అధికార పక్షం ఆరోపణలను ఖండించింది.

కర్ణాటకలో కాంగ్రెస్​-జేడీఎస్​ సంకీర్ణ ప్రభుత్వంపై నీలినీడలు కమ్ముకుంటున్నాయి. 13 మంది ఎమ్మెల్యేల రాజీనామాతో కుమారస్వామి సర్కార్​ భవిష్యత్తుపై అనిశ్చితి నెలకొంది. రాష్ట్రంలో ప్రస్తుత రాజకీయ సంక్షోభానికి కూటమి పార్టీలు మధ్య నెలకొన్న అంతర్గత కలహాలే కారణమని భాజపా విమర్శించింది. కూటమిని కూల్చేందుకు భాజపా ప్రయత్నాలు చేస్తోందన్న అధికార ప్రభుత్వం ఆరోపణను ఖండించింది.

అధికార పార్టీల ఎమ్మెల్యేల రాజీనామాలతో తమకు ఎలాంటి సంబంధం లేదని భాజపా మీడియా ప్రతినిధి, రాజ్యసభ సభ్యులు అనిల్ బలూని తెలిపారు. రాజకీయ ఆధిపత్యం కోసం కాంగ్రెస్-జేడీఎస్​ మధ్య యుద్ధం జరుగుతోందన్నారు. కుమారస్వామి ముఖ్యమంత్రిగా కొనసాగడం సిద్దరామయ్యకు ఇష్టం లేదని ఆరోపించారు. కర్ణాటకలో నెలకొన్న అస్థిత్వానికి ఈ రెండు పార్టీల ధోరణి కారణమని ఘాటు విమర్శలు చేశారు అనిల్​.

తగ్గనున్న మెజారిటీ...

కర్ణాటకలో మొత్తం 224 అసెంబ్లీ స్థానాలున్నాయి. గతేడాది జరిగిన ఎన్నికల్లో భాజపా 104 సీట్లు సాధించి అతిపెద్ద పార్టీగా అవతరించింది. కాంగ్రెస్‌ 80, జేడీఎస్‌ 37 సీట్లలో గెలిచింది. కన్నడనాట ప్రభుత్వ ఏర్పాటుకు కావాల్సిన మేజిక్‌ ఫిగర్‌ 113. ఎవరికీ మెజార్టీ రానందు వల్ల కాంగ్రెస్‌-జేడీఎస్‌ జట్టు కట్టి సంకీర్ణ ప్రభుత్వాన్ని ఏర్పాటుచేశాయి. అయితే ఆనంద్‌ సింగ్‌ రాజీనామాతో కాంగ్రెస్‌-జేడీఎస్‌ బలం 117కు పడిపోయింది. తాజాగా మరో 13 మంది ఎమ్మెల్యేలు రాజీనామా చేశారు. వీటిని స్పీకర్‌ ఆమోదిస్తే కూటమి బలం 104కి పడిపోయి ప్రభుత్వం కూలిపోయే ప్రమాదం ఉంది.

ఇదీ చూడండి: సంక్షోభం అంచున కర్ణాటక సంకీర్ణ సర్కార్​