సర్కారు వైఫల్యాలపై హస్తినలో కాంగ్రెస్ మెగా ర్యాలీ

ఆర్థిక మందగమనం, నిరుద్యోగం, వ్యవసాయ సంక్షోభం, ఆర్​సీఈపీ ఒప్పందం వంటి సమస్యలపై దిల్లీలో కాంగ్రెస్​ మెగా ర్యాలీ నిర్వహించనుంది. డిసెంబర్​లో ఈ ర్యాలీ నిర్వహించనున్నట్లు కాంగ్రెస్​ ప్రకటించింది.

మహారాష్ట్ర, హరియాణా శాసనసభ ఎన్నికల్లో వచ్చిన సానుకూల ఫలితాలతో కాంగ్రెస్​ కొత్త శక్తిని పుంజుకుంది. అదే జోరును కొనసాగిస్తూ.. అధికార భాజపాను ఇరుకున పెట్టేందుకు హస్తం పార్టీ కార్యాచరణను ప్రకటించింది. డిసెంబర్​లో మోదీ సర్కారు వైఫల్యాలను ఎండగట్టేందుకు దిల్లీలో మెగా ర్యాలీ నిర్వహించనున్నట్లు తెలిపింది.

ఆర్థిక మందగమనం, నిరుద్యోగం, వ్యవసాయ సంక్షోభం, ఆర్​సీఈపీ వంటి సమస్యలను ముఖ్యంగా ప్రస్తావించనున్నట్లు పార్టీ అధికార ప్రతినిధి రణ్​దీప్​ సుర్జేవాలా తెలిపారు. కాంగ్రెస్​ అధినేత్రి సోనియా గాంధీ, రాహుల్​ గాంధీ, జాతీయ ప్రధాన కార్యదర్శి ప్రియాంక గాంధీ చర్చించి త్వరలో ర్యాలీ తేదీ ప్రకటిస్తారన్నారు.

పార్టీ జాతీయ ప్రధాన కార్యదర్శులు, రాష్ట్రాల పార్టీ బాధ్యులతో ఏఐసీసీ ప్రధాన కార్యాలయంలో సోనియా గాంధీ అధ్యక్షతన జరిగిన సమావేశం అనంతరం ఈ ప్రకటన వెలువడింది.

నవంబర్​ 5-15 వరకు జిల్లా, రాష్ట్ర స్థాయిలో ప్రభుత్వ వైఫల్యాలపై కాంగ్రెస్​ నిరసనలు చేపడుతుందని సుర్జేవాలా తెలిపారు. ఆర్​సీఈపీ ఒప్పందానికి ప్రభుత్వం ఎట్టిపరిస్థితుల్లోనూ ఒప్పుకోకూడదని కాంగ్రెస్ డిమాండ్​ చేస్తోంది.

• ఇదీ చూడండి: '​స్పైవేర్​పై సమాధానమిచ్చే నిజాయతీ ప్రభుత్వానికి లేదు'