ఉత్తర ప్రదేశ్లో కాంగ్రెస్ కార్యకర్తల బిర్యానీ ఫైట్ విడియో సోషల్ మీడియాలో వైరల్ అవుతోంది. ఎన్నికల ప్రచారంలో భాగంగా నిర్వహించిన ఓ సమావేశం అనంతరం బిర్యానీ విందు ఏర్పాటు చేశారు. ఈ బిర్యానీ కార్యకర్తల మధ్య ఘర్షణకు కారణమైంది. కర్రలతో దాడి చేసుకునే వరకు వెళ్లింది.
బిజ్నోర్ లోక్సభ నియోజకవర్గ కాంగ్రెస్ అభ్యర్థి నసిముద్దీన్ సిద్దిఖీ ఉత్తర్ప్రదేశ్ ముజఫర్నగర్ జిల్లా తధేడా గ్రామంలో మాజీ ఎమ్మెల్యే మౌలానా జమీల్ ఇంటి వద్ద ప్రచారంలో పాల్గొన్నారు. ఈ సమావేశం అనంతరం మధ్యాహ్నం బిర్యానీ విందు ఏర్పాటు చేశారు. బంతిలో ముందుండాలని కార్యకర్తలు ఒక్కసారిగా ఎగబడ్డారు. దీంతో కార్యకర్తల మధ్య ఘర్షణ జరిగింది.
ఘటనా స్థలానికి చేరుకున్న పోలీసులు అల్లరి మూకలను చెదరగొట్టారు. మాజీ ఎమ్మెల్యే జమీల్, ఆయన కొడుకు నయీమ్ అహ్మద్ సహా 34 మందిపై ఎన్నికల నియమావళి ఉల్లంఘన కింద కేసు నమోదు చేసినట్లు సీఐ రామ్ మోహన్ శర్మ తెలిపారు. ఇప్పటి వరకు ఈ కేసులో 9మందిని అరెస్ట్ చేశామన్నారు. గ్రామంలో ఎలాంటి అవాంఛనీయ ఘటనలు చోటుచేసుకోకుండా అదనపు బలగాలను మోహరించారు.