కరోనా మహమ్మారి కారణంగా దేశంలో రైల్వే సేవలు నిలిచిపోయాయి. ఆ తర్వాత దశల వారీగా ప్రత్యేక రైళ్లను అందుబాటులోకి తీసుకువస్తోంది రైల్వే శాఖ. పెరుగుతున్న డిమాండ్ మేరకు.. రద్దీ రూట్లలో 40 క్లోన్ టైన్స్ నడుపుతోంది. ఈనెల 21 నుంచి అందుబాటులోకి రానున్నాయి. సాధారణ రైళ్లతో పోలిస్తే.. దాదాపు 3 గంటల ముందుగానే గమ్యస్థానాన్ని చేరుకుంటాయని రైల్వేశాఖ సీనియర్ అధికారి ఒకరు తెలిపారు.
"క్లోన్ ట్రైన్స్లో పూర్తిగా 3-ఏసీ కోచ్లు ఉంటాయి. చాలా తక్కువ స్టేషన్లలో ఆగడం, అత్యంత వేగంగా వెళ్లటం వల్ల గమ్యాన్ని పేరెంట్ ట్రైన్ కన్నా దాదాపు 3 గంటల ముందే చేరుకుంటుంది. ఈ రైళ్లు అత్యవసర పరిస్థితుల్లో లేదా చివరి నిమిషంలో ప్రణాళిక చేసుకున్న ప్రయాణికులకు వరంగా మారనున్నాయి. ప్రయాణాలు చేయాలనుకున్న వారందరినీ గమ్యస్థానాలకు చేరుస్తాం. ఈ 20 జతల రైళ్లు ప్రధానంగా బిహార్, బంగాల్, ఉత్తర్ప్రదేశ్, దిల్లీ, ఆంధ్రప్రదేశ్, కర్ణాటకల మధ్య నడవనున్నాయి. 2016లోనే ఈ రైళ్లకు బీజం పడినప్పటికీ కార్యరూపం దాల్చలేదు. ప్రస్తుతం కరోనాతో వీటికి మార్గం సుగమమైంది."
-సీనియర్ అధికారి, రైల్వే శాఖ.
బుకింగ్స్ ప్రారంభం..
20 జతల క్లోన్ ట్రైన్స్లో 19 రైళ్లకు (18 కోచ్లు) హమ్సఫర్ ఎక్స్ప్రెస్ ఛార్జీలు, మరో ట్రైన్ (22కోచ్లు, లఖ్నవూ- దిల్లీ)కు జన్శతాబ్ది టికెట్ రేట్లు వసూలు చేయనున్నారు. అడ్వాన్స్ రిజర్వేషన్ సమయాన్ని 10 రోజులుగా నిర్ణయించారు. బుకింగ్స్ సెప్టెంబర్ 19 ఉదయం 8 గంటలకు ప్రారంభమయ్యాయి.
రైళ్ల వివరాలు..
- తూర్పు మధ్య రైల్వే ఆధ్వర్యంలో 10 రైళ్లు (5 జతలు).. బిహార్-దిల్లీ మధ్య నడుస్తాయి. ఈ మార్గంలో బిహార్లోని సహార్సా, రాజేంద్రనగర్, రాజ్గిర్, దర్భాంగా, ముజఫర్పుర్లలో ఆగనున్నాయి.
- ఈశాన్య రైల్వే ఆధ్వర్యంలో రెండు రైళ్లు.. బిహార్ కటిహార్ నుంచి దిల్లీకి నడవనున్నాయి.
- ఉత్తర రైల్వే ఆధ్వర్యంలో 10 రైళ్లు(5 జతలు).. దిల్లీ-బిహార్, బంగాల్-దిల్లీ, పంజాబ్-బంగాల్, ఉత్తరప్రదేశ్-దిల్లీల మధ్య పరుగులు పెట్టనున్నాయి.
- దక్షిణ మధ్య రైల్వే ఆధ్వర్యంలో రెండు రైళ్లు... దనాపుర్(బిహార్) నుంచి సికింద్రాబాద్ మధ్య నడవనున్నాయి.
- దక్షిణ పశ్చిమ రైల్వే ఆధ్వర్యంలో 6 రైళ్లు(3 జతలు).. గోవా-దిల్లీ, కర్ణాటక-బిహార్, కర్ణాటక-దిల్లీ మధ్య పరుగులు పెట్టనున్నాయి.
- పశ్చిమ రైల్వే ఆధ్వర్యంలో 10 రైళ్లు(5 జతలు).. బిహార్(దర్భాంగ)- గుజరాత్(అహ్మదాబాద్), దిల్లీ-గుజరాత్, బిహార్(ఛాప్రా)- గుజరాత్(సూరత్), ముంబయి-పంజాబ్, గుజరాత్(అహ్మదాబాద్)- బిహార్(పట్నా)ల మధ్య నడపనుంది.
దేశవ్యాప్తంగా విధించిన లాక్డౌన్ కారణంగా మార్చి 25 నుంచి అన్ని రకాల ప్రయాణ రైళ్లను నిలిపివేసింది భారతీయ రైల్వే శాఖ. ఆ తర్వాత దశల వారీగా కొన్ని రైళ్లను అందుబాటులోకి తెచ్చింది. వలస కార్మికల కోసం శ్రామిక్ రైళ్లును మే 1 నుంచి నడుపుతోంది. తర్వాత 230 ప్రత్యేక రైళ్లను దేశవ్యాప్తంగా నడుపుతోంది. సెప్టెంబర్ 12 నుంచి మరో 80 ప్రత్యేక రైళ్లను తీసుకొచ్చింది.
ఇదీ చూడండి: పీజీ మెడికోలకు 3 నెలలు జిల్లా ఆస్పత్రుల్లోనే శిక్షణ
