కేరళ పడవ పోటీల్లో ఛాంపియన్స్​కు షాక్​..!

కేరళలో ఛాంపియన్​ బోట్​ లీగ్ 5వ దఫా పోటీలు అట్టహాసంగా సాగాయి. గత నాలుగు పోటీల్లో విజేతగా నిలిచిన నడుభాగం జట్టుకు షాకిస్తూ.. ఛంబకులమ్​ జట్టు విజయం సాధించింది. ఆద్యంతం పోటీలు ఉత్కంఠగా సాగాయి.

కేరళలో జరుగుతోన్న ఛాంపియన్​ బోట్​ లీగ్​ (సీబీఎల్​)లో భాగంగా 5వ స్నేక్​ బోట్​ రేస్​ పోటీలు కొచ్చి తీరంలో అట్టహాసంగా జరిగాయి. గత నాలుగు పోటీల్లో గెలిచి.. వరుస విజయాలతో దూసుకెళుతున్న నడుభాగం జట్టుకు ఛంబకులమ్​ జట్టు షాకిచ్చింది. 17 మిల్లీ సెకన్ల తేడాతో తొలిస్థానాన్ని కైవసం చేసుకుంది.

960 మీటర్ల పోటీ ఆద్యంతం ఉత్కంఠగా సాగింది. మూడు జట్లు నువ్వానేనా అన్నట్లు పోటీపడ్డాయి. కేవలం క్షణాల వ్యవధిలోనే స్థానాలు మారిపోయాయి. ఛంబకులమ్​ జట్టు 3 నిమిషాల 17.99 సెకన్లలో గమ్యాన్ని చేరుకుంది. నడుభాగం జట్టు 3 నిమిషాల 18.16 సెకన్లలో చేరింది. కరిచల్​ జట్టు 3 నిమిషాల 18.41 సెకన్లతో మూడోస్థానంలో నిలిచింది.

5వ పోటీల అనంతరం సీబీఎల్​ లీగ్​లో 68 పాయింట్లతో నడుభాగం జట్టు మొదటి స్థానంలో కొనసాగుతోంది. ఛంబకులమ్​ జట్టు 37 పాయింట్లతో రెండో స్థానంలో ఉంది. దేవాస్​ జట్టు 34 పాయింట్లతో 3వ స్థానంలో ఉంది. ఈ పోటీల్లో మొత్తం 9 జట్లు పాల్గొన్నాయి.

రాష్ట్ర పర్యటక శాఖ కార్యదర్శి రాణి జార్జ్​ ఈ పోటీలను ప్రారంభించారు. పి.బాలకిరణ్​, నటుడు తొవినో థామస్​..​ విజేతలకు బహుమతులు అందించారు. ఈ పోటీల ప్రారంభోత్సవం అంగరంగ వైభవంగా జరిగింది. ముందుగా చిన్న బోట్ల పోటీలు నిర్వహించారు. కేరళ సంప్రదాయ నృత్యాలు, కళలు.. ప్రదర్శించారు.

తదుపరి సీబీఎల్​ పోటీలు..

త్రిసూర్​లోని కొట్టపురమ్​లో ఈనెల 12న 6వ పోటీలు జరగనున్నాయి. అక్టోబర్​ 19న మల్లపురమ్​లోని పొన్నానిలో 7వ పోటీలు, నవంబర్​ 2న అలెప్పీలోని పులింకున్నులో 8వ పోటీలు, నవంబర్​ 16న కొల్లమ్​లోని కల్లడలో 9వ పోటీలు, నవంబర్​ 23న కొల్లంలో​ ప్రెసిడెంట్​ ట్రోఫీ జరగనుంది.

ఇదీ చూడండి: ముంబయి: 2,600 వృక్షాల రక్షణకై ఆందోళనలు