ప్రజాస్వామ్యానికే దంతెవాడ ఓటర్ల జై

ఛత్తీస్​గఢ్​ దంతెవాడలో ఎన్నికలు బహిష్కరించాలని పిలుపునిచ్చారు మావోయిస్టులు​. హెచ్చరికగా స్థానిక భాజపా ఎమ్మెల్యేను చంపేశారు. ప్రజలు మాత్రం ప్రజాస్వామ్యానికే జైకొట్టారు. జిల్లాలోని గ్రామీణ ఓటర్లు భారీ ఎత్తున ఓటు హక్కు వినియోగించుకుంటున్నారు.

ఛత్తీస్​గఢ్​లో నక్సల్​ ప్రాబల్య ప్రాంతమైన దంతెవాడలో ప్రజాస్వామ్యం వెల్లివిరిసింది. సార్వత్రిక ఎన్నికలను బహిష్కరించాలన్న ప్రకటనలు, స్థానిక శాసనసభ్యుడ్ని హత్యచేసి నక్సలైట్లు సృష్టించిన భయాందోళనలను స్థానికులు బేఖాతరు చేశారు. పెద్దసంఖ్యలో ఓటింగ్​లో పాల్గొంటున్నారు.

మంగళవారం భాజపా ఎమ్మెల్యే భీమా మండావి హత్యకు గురైన శ్యామగిరి గ్రామ పంచాయతీ పరిధిలోనూ పోలింగ్​ సజావుగా సాగుతోంది. ఘటనా స్థలానికి దగ్గరలోని 220 పోలింగ్​ బూత్​ వద్ద రద్దీ నెలకొంది.

బస్తర్​ నియోజకవర్గంలో 11 గంటల ప్రాంతంలోనే సుమారు 23 శాతం ఓట్లు పోలవటం విశేషం. బస్తర్​లో ఏడుగురు అభ్యర్థులు పోటీలో నిలిచారు.

భారీ బందోబస్తు

నక్సల్స్ దాడి నేపథ్యంలో భారీ బందోబస్తు ఏర్పాటు చేసింది ఎన్నికల సంఘం. బస్తర్​ నియోజకవర్గంలో సుమారు 80వేల మంది సాయుధ బలగాలతో పహారా కాస్తోంది.

నక్సల్స్ హెచ్చరిక

నియోజకవర్గంలో 13,72,127 ఓటర్లు ఉండగా 1,879 పోలింగ్ కేంద్రాలను ఏర్పాటు చేశారు. ఇందులో 741 కేంద్రాలను అత్యంత సమస్యాత్మకమైనవిగా గుర్తించింది ఈసీ.

అదుపులో నలుగురు మావోలు

బస్తర్​ పరిధిలోని బిజాపూర్​లో నలుగురు మావోలను అదుపులోకి తీసుకున్నారు పోలీసులు. వారివద్ద నుంచి మూడు ఆయుధాలను స్వాధీనం చేసుకున్నారు. వీరిని మాడ్​ తాలుకాకు చెందిన నక్సలైట్లుగా గుర్తించారు పోలీసులు.

పోలింగ్ ప్రారంభానికి కొద్ది సమయం ముందే నారాయణపూర్​ జిల్లాలో ఐఈడీ పేలుళ్లకు పాల్పడ్డారు మావోలు. ఈ ఘటనలో ఎవరికీ గాయాలు కాలేదు. పరిసర ప్రాంతాలను పూర్తిగా అదుపులోకి తీసుకున్నాయి బలగాలు.

ఇదీ చూడండి: సార్వత్రిక సమరం: జోరుగా తొలిదశ పోలింగ్​