చర్చలకు రావాలని రైతులకు మరోసారి కేంద్రం లేఖ

నూతన వ్యవసాయ చట్టాలపై చర్చలకు రావాలని కేంద్రం మరోసారి రైతు సంఘాలకు లేఖ రాసింది. అన్నదాతలకు ఆమోదయోగ్యమైన పరిష్కారం చూపేందుకు ప్రభుత్వం సిద్ధంగా ఉన్నట్లు తెలిపింది.

నూతన వ్యవసాయ చట్టాలకు వ్యతిరేకంగా దిల్లీ చుట్టుపక్కల ఆందోళన చేస్తున్న రైతులను కేంద్ర ప్రభుత్వం మరోసారి చర్చలకు ఆహ్వానించింది. ఈ మేరకు కేంద్ర వ్యవసాయ శాఖ సంయుక్త కార్యదర్శి వివేక్‌ అగర్వాల్‌.. 40 వ్యవసాయ సంఘాలను ఉద్దేశిస్తూ తదుపరి విడత చర్చల కోసం తేదీ, సమయం వారే నిర్ణయించుకోవాలని తెలిపారు.

రైతులు లేవనెత్తుతున్న అంశాలపై న్యాయబద్ధ పరిష్కారానికి ప్రభుత్వం కట్టుబడి ఉందని ఆయన ఈ లేఖలో తెలిపారు. కనీస మద్దతు ధరను కొనసాగిస్తామని హామీ ఇచ్చారు. ఇటీవల కూడా చర్చలకు రావాలని లేఖ ద్వారా కేంద్ర ప్రభుత్వం రైతులకు విజ్ఞప్తి చేయగా, బుధవారం వారు తిరస్కరించారు.

నిర్ధిష్టమైన ప్రతిపాదనలతో ముందుకు వస్తేనే చర్చలకు వస్తామని రైతు సంఘాలు స్పష్టం చేశాయి. ఈ నేపథ్యంలో కేంద్ర ప్రభుత్వం చర్చల కోసం మరోసారి లేఖ రాసింది.