ప్రధానమంత్రి నరేంద్ర మోదీ నేతృత్వంలో సమావేశమైన కేంద్ర మంత్రివర్గం బుధవారం ఆధార్ సహా పలు చట్టాల సవరణలకు ఆమోదం తెలిపింది.
ఆధార్ సవరణ బిల్లుకు ఆమోదం
ఆధార్ సవరణ బిల్లు-2019ని కేంద్రమంత్రి వర్గం ఆమోదించింది. ఫలితంగా రాష్ట్ర ప్రభుత్వ పథకాలు, రాయితీల కోసం ఆధార్ డేటాను (బయోమెట్రిక్ ఐడీ) ఉపయోగించుకోవడానికి వీలు కలుగుతుంది.
"దేశంలో 128 కోట్ల ఆధార్ కార్డులు నమోదై ఉన్నాయి. రాష్ట్ర ప్రభుత్వ రాయితీల బదిలీకి ఆధార్ ఉపయోగించడం వల్ల నకిలీ లబ్ధిదారులను గుర్తించడానికి, తొలగించడానికి వీలవుతుంది."
-ప్రకాశ్ జావడేకర్, కేంద్ర సమాచార, ప్రసారశాఖ మంత్రి
స్వచ్ఛందమే..
'ఆధార్' స్వచ్ఛంద వినియోగాన్ని అనుమతించేలా ఈ నెల ప్రారంభంలో పార్లమెంట్ ఓ సవరణ తీసుకొచ్చింది. ఫలితంగా మొబైల్ ఫోన్ సిమ్ కార్డులు పొందటానికి, బ్యాంకు ఖాతాలు తెరవడానికి ఆధార్ను ఐడీ ప్రూఫ్గా ఉపయోగించుకోవాలా? లేదా? అన్నది ఇకపై వినియోగదారుడు నిర్ణయించుకుంటాడు.
చెరకు రైతులకు మిగిలింది నిరాశే..
చెరకు రైతులకుకేంద్ర ప్రభుత్వం మళ్లీ నిరాశనే మిగిల్చింది. చెరకు కొనుగోలు కోసం మిల్లుల యజమానులు రైతులకు చెల్లించాల్సిన కనీస మద్దతు ధరే... ఎఫ్ఆర్పి (ఫెయిర్ అండ్ రెమ్యునరేటివ్ ప్రైస్). అయితే 2019-20 మార్కెట్ సంవత్సరానికి (అక్టోబర్- సెప్టెంబర్) కూడా క్వింటాల్కు రూ.275 మద్దతు ధరనే కొనసాగించి రైతుల ఆశలపై నీళ్లు జల్లింది.
2019-20 మధ్య 4 మిలియన్ టన్నుల చక్కెర బఫర్ స్టాక్(అదనపు నిల్వలు)ను పెంచేందుకు ఆహార మంత్రిత్వశాఖ చేసిన ప్రతిపాదనలకు ఆర్థిక వ్యవహారాల కేబినెట్ కమిటీ (సీసీఈఏ) ఆమోదం తెలిపి కాస్త ఊరట కలిగించింది. అలాగే 2019-20 సీజన్లో రైతులకు చక్కెర మిల్లుల బకాయిలు రూ.15 వేల కోట్లు చెల్లించాలని కేంద్రమంత్రివర్గం నిర్ణయించింది.
'ఫాక్ట్'కే వినియోగించాలి
ఫెర్టిలైజర్స్ అండ్ కెమికల్స్ ట్రావెన్కోర్ (ఫాక్ట్) వద్ద ఉన్న 481.79 ఎకరాల భూమిని కేరళ ప్రభుత్వానికి విక్రయించి.. వచ్చిన ఆదాయాన్ని ఫాక్ట్కే వినియోగించాలన్న ప్రతిపాదనను కేంద్రమంత్రివర్గం ఆమోదించింది.
నేషనల్ ఇన్స్టిట్యూట్ ఆఫ్ మైనర్స్ హెల్త్ను... నేషనల్ ఇన్స్టిట్యూట్ ఆఫ్ ఆక్యుపేషనల్ హెల్త్లో విలీనం చేయడానికీ మంత్రివర్గం ఆమోదం తెలిపింది.
ఇదీ చూడండి: ఉగ్రవాద వ్యతిరేక బిల్లుకు లోక్సభ ఆమోదం
