మహారాష్ట్రలో శనివారం అర్ధరాత్రి ఘోరప్రమాదం చోటుచేసుకుంది. భివండీలోని ఓ నాలుగంతస్తుల భవనం కుప్పకూలింది. ఈ ఘటనలో ఇద్దరు ప్రాణాలు కోల్పోయారు. మరో ఐదుగురు తీవ్ర గాయాలపాలయ్యారు.
ఈ ఘటనపై సమాచారం అందిన వెంటనే పోలీసులు, ఎన్డీఆర్ఎఫ్ బృందం, అగ్నిమాపక సిబ్బంది ఘటనాస్థలానికి చేరుకొని సహాయక చర్యలు చేపట్టారు. క్షతగాత్రులను ఆసుపత్రికి తరలించారు.
"ఈ విషయంపై మాకు సమాచారం అందిన వెంటనే స్పందించాం. ఎన్డీఆర్ఎఫ్ బృందం, అగ్నిమాపక సిబ్బంది ఘటనాస్థలంలో సహాయక చర్యలు ముమ్మరం చేశాయి. ఇప్పటి వరకు ఇద్దరు మృతిచెందారు. ఐదుగురు గాయపడ్డారు. ఎవరైనా గల్లంతయ్యారా? అని చుట్టుపక్కల వారిని అడిగాం. ఇప్పటివరకు అలాంటి సమాచారం అందలేదు. ఈ ఘటనలో మృతుల సంఖ్య పెరిగే అవకాశం చాలా తక్కువ. సహాయక చర్యలు ముమ్మరంగా సాగిస్తున్నాం.
--- పోలీసు అధికారి.
భవనం కుప్పకూలడానికి గల కారణాలు తెలిసిరాలేదు. ఘటనపై దర్యాప్తు చేపట్టినట్టు అధికారులు తెలిపారు.
