వార్​ వన్​సైడ్​... మరోమారు కమల వికాసం!

సార్వత్రిక సమరం ఏకపక్షమైంది. భాజపా ఆధిక్యంలో దూసుకెళుతోంది. ఎగ్జిట్​పోల్స్​ అంచనాలను నిజం చేస్తూ భారీ గెలుపు దిశగా పయనిస్తోంది. కీలకమైన రాష్ట్రాల్లో సత్తా చాటుతోంది. రెండోసారి అధికారానికి దగ్గర్లో ఉంది. కాంగ్రెస్​ నేతృత్వంలోని యూపీఏ తమిళనాడు మినహా మిగిలిన రాష్ట్రాల్లో చతికిలపడింది. అమేఠీలో రాహుల్​ గాంధీ వెనుకంజలో ఉన్నారు.

సార్వత్రిక ఎన్నికల ఓట్ల లెక్కింపులో భారతీయ జనతా పార్టీ నేతృత్వంలోని ఎన్డీఏ స్పష్టమైన ఆధిక్యం దిశగా దూసుకెళుతోంది. గుజరాత్​, ఉత్తరప్రదేశ్​, కర్ణాటక, మహారాష్ట్ర, మధ్యప్రదేశ్​ రాష్ట్రాల్లో హవా కొనసాగిస్తోంది. దేశ రాజధాని దిల్లీలో సత్తా చూటుతోంది. బంగాల్​లోనూ తృణమూల్​ కాంగ్రెస్​కు దీటైన పోటీనిస్తోంది.
కాంగ్రెస్​ నేతృత్వంలోని యూపీఏ మాత్రం తమిళనాడు మినహా అన్ని చోట్ల చతికిలపడింది. ఆ రాష్ట్రంలో డీఎంకే పూర్తి ఆధిక్యాన్ని కనబరుస్తోంది. బిహార్​లోనూ కాంగ్రెస్​ కూటమి రాజకీయాలు ఫలించే అవకాశం కనిపించడం లేదు.

ఫలించిన వ్యూహాలు

ప్రస్తుతం ఓట్ల లెక్కింపు సరళిని చూస్తే ఐదేళ్లలో పెరిగిన మోదీ ప్రాబవం ఏ మాత్రం తగ్గలేదని అర్థమవుతోంది. భాజపా.. దేశ భద్రత, జాతీయవాదం నినాదాలు, మోదీ ప్రచారం ఫలించినట్టే కనిపిస్తున్నాయి.

అమేఠీలో వెనుకంజలో రాహుల్​

ఉత్తర ప్రదేశ్​లోని అమేఠీలో కాంగ్రెస్​ అధ్యక్షుడు రాహుల్​ గాంధీ వెనుకబడ్డారు. భాజపా అభ్యర్థి స్మృతీ ఇరానీ ముందంజలో ఉన్నారు. కేరళలోని వయనాడ్​లో రాహుల్​ గాంధీ ఆధిక్యంలో ఉన్నారు. రాయ్​బరేలీలో సోనియా గాంధీ ముందంజలో ఉన్నారు.

ఉత్తరప్రదేశ్​లోని వారణాసిలో ప్రధాని మోదీ భారీ ఆధిక్యంలో కొనసాగుతున్నారు. గుజరాత్​లోని గాంధీ నగర్​లో భాజపా అధ్యక్షుడు అమిత్​షా ముందంజలో ఉన్నారు.

ఇదీ చూడండి : కీలక రాష్ట్రాల్లో భాజపా విజయబావుటా..!