అసెంబ్లీ ఎన్నికల తేదీలు ప్రకటించడంతోనే బిహార్లో రాజకీయాలు ఊపందుకున్నాయి. ప్రధాన పార్టీలన్నీ అస్త్రశస్త్రాలతో సిద్ధమయ్యాయి. ముఖ్యమంత్రి, జేడీయూ అధినేత నితీశ్ కుమార్ లక్ష్యంగా ప్రతిపక్షాలు అదేపనిగా విమర్శాస్త్రాలు సంధిస్తున్నాయి. వాటిని తిప్పికొట్టడంతో పాటు మరోసారి అధికార పగ్గాలు చేపట్టేందుకు నితీశ్ వ్యూహరచన చేస్తున్నారు. ఇందులో భాగంగా తనకు అత్యంత సన్నిహితులు, నమ్మకస్థులు అయిన ఐదుగురు నేతలకు ఆయన కీలక బాధ్యతలు అప్పగించారు. ఎన్నికల ప్రధాన వ్యూహాల అమలు, పార్టీ వ్యవహారాల్లో వీరే కీలకంగా పనిచేస్తారని సమాచారం. పార్టీ వర్గాల్లో 'పంచరత్నాలు'గా పిలుస్తున్న ఆ ఐదుగురు నేతలు ఎవరు? వారి ప్రత్యేకతలేమిటన్నది ఆసక్తికరం.
ఆర్సీపీ సింగ్..
ముఖ్యమంత్రి నితీశ్కు అత్యంత నమ్మకస్థుల్లో ముందుండే నేత ఆర్సీపీ సింగ్, మాజీ ఐఏఎస్ అధికారి అయిన ఆయన జేడీయూ జాతీయ ప్రధాన కార్యదర్శిగా పనిచేస్తున్నారు. చాలాకాలంగా పార్టీ వ్యవహారాలను చూస్తున్నారు. నితీశ్కు అత్యంత సన్నిహితుడైన ఆర్సీపీ సింగ్ ప్రస్తుతం రాజ్యసభలో పార్టీపక్ష నేత.
లాలన్ సింగ్...
జేడీయూకు ఒకప్పుడు రాష్ట్ర అధ్యక్షుడిగా, రాష్ట్రానికి మంత్రిగా కూడా చేశారు. ప్రస్తుతం లోక్సభలో పార్టీపక్ష నేతగా ఉన్నారు. చాలాకాలంగా నితీశ్-లాలన్ల మధ్య బలమైన స్నేహం ఉంది. చాలామేర నిర్ణయాలు తీసుకునేటప్పుడు నితీశ్ ఆయన్ను సంప్రదిస్తుంటారు. భాజపాతో జేడీయూ రెండోసారి జట్టు కట్టడం వెనుక లాలన్ పాత్ర చాలా కీలకమని చెబుతుంటారు.
విజయ్ చౌధరీ...
బిహార్ అసెంబ్లీ స్పీకర్ విజయ్ చౌధరీపై నితీశ్ ఎఁతో నమ్మకం పెట్టుకున్నారు. ఆయన కూడా గతంలో జేడీయూ రాష్ట్ర అధ్యక్షుడిగా పనిచేశారు. రాష్ట్రంలో జరిగే కీలక కార్యక్రమాలు, సమావేశాలన్నింటిలోనూ నితీశ్ వెంట ఆయన హాజరవుతుంటారు. సరయ్రంజన్ నియోజకవర్గం నుంచి రెండు సార్లు ఎమ్మెల్యేగా ఎన్నికైన విజయ్ మూడోసారి కూడా బరిలోకి దిగనున్నట్లు తెలుస్తోంది.
సంజయ్ ఝా...
ఒకప్పుడు భాజపాలో ఉన్న సంజయ్, నితీశ్తో తనకున్న సాన్నిహిత్యంతో తర్వాత జేడీయూలో చేరారు. కేంద్రంలోని చాలా మంది భాజపా నేతలతో సంజయ్కు సత్సంబంధాలున్నాయి. నితీశ్ ఆయనతో ముఖ్యమైన సలహా సంప్రదింపులన్నీ చేస్తుంటారు. బిహార్లోని దర్బాంగాలో ఎయిమ్స్కు అనుమతి సంపాదించడంలో సంజయ్ కీలకపాత్ర పోషించినట్లు చెబుతారు. దర్బంగా నుంచి గతంలో లోక్సభకు పోటీచేయాలని భావించినా.. సీట్ల పంపకంలో భాగంగా అది భాజపాకు కేటాయించారు. దీంతో సంజయ్ను నితీశ్ శాసనమండలిలోకి తీసుకోవడమే కాకుండా కీలక మంత్రి పదవి కూడా ఇచ్చారు.
అశోక్ చౌధరీ...
ఒకప్పుడు కాంగ్రెస్ పార్టీ రాష్ట్ర అధ్యక్షుడిగా పనిచేసిన అశోక్కు నితీశ్తో చాలాకాలంగా మంచి సంబంధాలున్నాయి. ఈ నేపథ్యంలో తర్వాత తన పరివారంతో ఆయన జేడీయూలో చేరి పోయారు. నితీశ్కు అత్యంత సన్నిహితుల్లో ఒకరిగా ఎదిగారు. అశోక్ను ఎంతగానో విశ్వసించే నితీశ్ ఆయనకు జేడీయూ రాష్ట్ర కార్యనిర్వాహక అధ్యక్ష పదవితో పాటు, కీలక మంత్రి పదివినీ కట్టబెట్టారు. నితీశ్ తీసుకునే నిర్ణయాల్లో ఈయన పాత్ర కూడా ఉంటుందని చెబుతారు.
