'విద్యాసాగర్' కేసుపై విచారణ కమిటీ నియామకం

ప్రముఖ సంఘ సంస్కర్త ఈశ్వర చంద్ర విద్యాసాగర్​ విగ్ర​హ ధ్వంసంపై విచారణ కమిటీని నియమించింది బంగాల్​ ప్రభుత్వం.  ఈ నెల మొదటి వారంలో కోల్​కతాలో భాజపా ర్యాలీ నిర్వహిస్తుండగా జరిగిన ఘటనపై ఇప్పటికే 35 మందిని అదుపులోకి తీసుకన్నట్టు తెలిపారు బంగాల్ సీఎం మమతా బెనర్జీ.

బంగాల్​లో ఉద్రిక్తతలకు దారితీసిన విగ్రహ ధ్వంసం కేసులో విచారణను వేగవంతం చేస్తోంది అక్కడి ప్రభుత్వం. కోల్​కతాలో భాజపా సభ సందర్భంగా ఓ కళాశాలలోని ప్రముఖ సంఘ సంస్కర్త ఈశ్వర చంద్ర విద్యాసాగర్​ విగ్రహం ధ్వంసమయింది. ఈ విషయంలో నిజాలను నిగ్గుతేల్చేందుకు ఐదుగురు సభ్యులతో కమిటీని ఏర్పాటు చేసినట్లు బంగాల్ సీఎం మమతా బెనర్జీ తెలిపారు.

"ఎన్నికల వేళ విద్యాసాగర్​ విగ్రహాన్ని దుండగులు ధ్వంసం చేశారు. మేం ఓ కమిటీని నియమించాం. అప్పుడు జరిగిన సంఘటనలు, కారణాలపై కమిటీ విచారిస్తుంది. ఈ కేసులో ఇప్పటికే 35 మందిని అదుపులోకి తీసుకున్నాం. రెండు ఎఫ్​ఐఆర్​లు నమోదు చేశాం."

-మమతా బెనర్జీ, బంగాల్ ముఖ్యమంత్రి

కమిటీ సభ్యుల్లో కొత్తగా నియమితులైన హోంశాఖ కార్యదర్శి ఆలాపన్​ బంధ్యోపాధ్యాయ్, కోల్​కతా సీపీ అనుజ్ శర్మ, అదనపు సీపీ జావేద్ షమీన్​, విద్యాసాగర్​ కళాశాల ప్రధానోపాధ్యాయులు గౌతం కుందూ ఉన్నారు.

రాష్ట్రంలో భారీగా బదిలీలు

రాష్ట్ర హోంశాఖ నూతన కార్యదర్శిగా ఆలాపన్​ బంధ్యోపాధ్యాయ్​ను నియమించింది బంగాల్ ప్రభుత్వం. వీరితో పాటు పలువురు ఐఏఎస్​, ఐపీఎస్​ సహా 10 మంది జిల్లా మేజిస్ట్రేట్​లను బదిలీ చేసింది.