పంజాబ్ తరన్‌ తారన్‌ జిల్లా భిఖీవిండ్‌లో తన ఇంటి సమీపంలోనే శౌర్యచక్ర పురస్కార గ్రహీత బల్వీందర్ సింగ్ దారుణ హత్యకు గురయ్యారు. ఓ ద్విచక్రవాహనంపై వచ్చిన ఇద్దరు దుండగులు సింగ్‌ని తుపాకీతో కాల్చారని, ఆయన శరీరంలోకి నాలుగు తూటాలను దించి అక్కడి నుంచి పరారయ్యారని పోలీసులు తెలిపారు. ఆసుపత్రికి తీసుకెళ్లేసరికి సింగ్ ప్రాణాలొదిలారని వైద్యులు చెప్పారన్నారు.
'ఉగ్రవాదుల పనే' :
ఇది కచ్చితంగా ఉగ్రవాదుల పనేనని, తమకు ఎలాంటి శత్రుత్వం లేదని సింగ్ భార్య స్పష్టం చేశారు. తమ కుటుంబంపై 62 ఉగ్రదాడులు జరిగినట్లు ఆమె చెప్పారు. తమకు భద్రత కల్పించాలని చాలాసార్లు డీజీపీ దిన్‌కర్‌ గుప్తాకి విజ్ఞప్తి చేసినా.. ఫలితం లేకపోయిందని ఆమె వివరించారు.