నేరాన్ని అడ్డుకున్నందుకు ట్రాఫిక్ పోలీసుపై దాడి

బిహార్​లోని ముజ్​ఫర్​పుర్​లో ఓ ఆటోడ్రైవర్​ పోలీసుపై దాడి చేశాడు. ట్రాఫిక్​ నిబంధనలను ఉల్లంఘించాడని అడ్డుకోవడమే దీనికి కారణం.

ట్రాఫిక్​ నిబంధనలను ఉల్లంఘించాడని అడ్డుకున్నందుకు ఓ పోలీసును చితకబాదాడు ఓ ఆటో డ్రైవర్​. అతనికి మరికొందరు తోడయ్యారు. మూకుమ్మడిగా పోలీసుపై పిడిగుద్దులు కురిపిస్తూ తీవ్రంగా దాడి చేశారు. కింద పడేసి ఇష్టం వచ్చినట్లు తన్నారు. ఈ ఘటన మంగళవారం రాత్రి బిహార్​లోని ముజ్​ఫర్​పుర్​లో చోటుచేసుకుంది.

అఘోరియా బజార్​ చౌక్​ వద్ద నిషేధిత మార్గం​లో వెళ్తున్న ఆటోను విధుల్లో ఉన్న పోలీసు అడ్డుకున్నాడు. ఆగ్రహించిన ఆటో డ్రైవర్, అతడి స్నేహితులు కలిసి​​ ఆ పోలీసుపై దాడి చేశారు. చుట్టుపక్కన వారు వారించే ప్రయత్నం చేసినా డ్రైవర్​ ఆగలేదు. అతన్ని కొట్టుకుంటూ కొంతదూరం లాక్కెళ్లారు. ఇంతలో కొందరు స్థానికులు అక్కడికి చేరుకున్నారు. పోలీసులు రాగానే అక్కడ్నించి పరారయ్యారు దుండగులు. దాడిలో గాయపడ్డ పోలీసు సమీప ఆసుపత్రిలో చికిత్స పొందుతున్నాడు. నిందితుల కోసం పోలీసులు గాలిస్తున్నారు.