అసోం ఎన్​ఆర్​సీపై దేశవ్యాప్తంగా అసమ్మతి స్వరాలు

అసోం జాతీయ పౌర జాబితా (ఎన్​ఆర్​సీ)పై విపక్ష పార్టీలు అసంతృప్తి వ్యక్తం చేశాయి. నిజమైన భారతీయులకు అన్యాయం జరిగిందని అభిప్రాయపడ్డాయి. దీనిపై న్యాయపరంగా పోరాటం చేస్తామని ప్రకటించాయి.

అసోం జాతీయ పౌర జాబితాపై దేశవ్యాప్తంగా అసమ్మతి స్వరాలు వినిపిస్తున్నాయి. 19 లక్షల మంది ప్రజలకు జాబితాలో చోట దక్కకపోవటంపై విపక్ష పార్టీలు ఆందోళన వ్యక్తం చేశాయి. చోటు దక్కని భారతీయులకు భరోసా కల్పించాలని ప్రభుత్వాన్ని డిమాండ్ చేశాయి.

న్యాయపోరాటం: కాంగ్రెస్​

ఎన్​ఆర్​సీ జాబితాపై కాంగ్రెస్​ అధ్యక్షురాలు సోనియాగాంధీ పార్టీ నాయకులతో సమావేశమయ్యారు. ఈ సందర్భంగా జాబితాలో చోటు దక్కిని వారికి మద్దతుగా కాంగ్రెస్​ నిలుస్తుందని ప్రకటించారు నాయకులు. చోటు దక్కని నిజమైన భారత పౌరులకు బాసటగా నిలుస్తామన్నారు కాంగ్రెస్​ లోక్​సభ పక్ష నేత అధీర్​ రంజన్​ చౌదరి. వారి కోసం న్యాయ పోరాటం చేస్తామన్నారు.

భరోసా కల్పించాలి: సీపీఎం

19 లక్షల మందికి చోటు దక్కకపోవటం ఆందోళనకలిగించే విషయమని పేర్కొంది సీపీఎం. జాబితాలో పేరు లేని నిజమైన భారత పౌరులను తిరిగి చేర్చుకుంటామని భరోసా కల్పించాలని ప్రభుత్వాన్ని డిమాండ్​ చేసింది. బాధితుల పరిస్థితి, హక్కులపై ప్రభుత్వం ప్రకటన విడుదల చేయాలని కోరింది. విదేశీ ట్రైబునళ్లకు న్యాయ అధికారాలు కల్పించాలని.. లేకుంటే ఉపయోగం ఉండదని అభిప్రాయపడింది.

భాజపా విఫలం:తరుణ్​ గొగొయి​

స్వేచ్ఛాయుత, న్యాయమైన ఎన్​ఆర్​సీని నిర్ధరించడంలో పాలక భాజపా విఫలమైందని విమర్శించారు అసోం మాజీ ముఖ్యమంత్రి తరుణ్​ గొగోయ్​. ఎన్​ఆర్​సీ జాబితా విడుదల విధానంపై అసంతృప్తి వ్యక్తం చేశారు. నిజమైన పౌరుల పేర్లు జాబితాలో లేవని తెలిపారు.

బెంగాలీలపై కుట్ర: మమత

ఎన్​ఆర్​సీ జాబితాపై తీవ్ర విమర్శలు చేశారు తృణమూల్​ కాంగ్రెస్​ అధినేత్రి, బంగాల్​ ముఖ్యమంత్రి మమతా బెనర్జీ. అసోం నుంచి బెంగాలీలను పంపేందుకు జరిగిన కుట్రని ఆరోపించారు. దశాబ్దాల కాలంగా రాష్ట్రంలో నివసిస్తున్న వారిని విదేశీయులుగా ఎలా గుర్తిస్తారని ప్రశ్నించారు.

ఏజీపీ అసంతృప్తి..

అసోం ఎన్​ఆర్​సీపై అసంతృప్తి వ్యక్తం చేసింది ఆ రాష్ట్ర ప్రభుత్వ కూటమి పార్టీ అసోం గణ పరిషత్​ (ఏజీపీ). జాబితాలో పేర్లు లేని వారి సంఖ్య అత్యంత తక్కువగా ఉండటం హాస్యాస్పదమని ఏజీపీ అధ్యక్షుడు అతుల్​ బోరా తెలిపారు. జాబితాను పర్యవేక్షించిన సుప్రీం కోర్టులో దానిని సమీక్షించేందుకు అవకాశం ఉందని చెప్పారు.

ఇదీ చూడండి: తుది ఎన్​ఆర్​సీపై విశ్వాసం లేదు: అసోం భాజపా