మళ్లీ అదే కథ.. చొరబాటుకు చైనా విఫలయత్నం!

వాస్తవాధీన రేఖ వెంబడి ఉన్న భారత భూభాగాన్ని ఆక్రమించుకునేందుకు మరోమారు చైనా ప్రయత్నించినట్టు సమాచారం. చుముర్​ ప్రాంతంలోకి భారీగా వాహనాలను తరలించేందుకు చైనా సిద్ధపడినట్టు తెలుస్తోంది. అయితే అప్పటికే ఆ ప్రాంతంలో భారీ స్థాయిలో ఉన్న భారత సైన్యాన్ని చూసి చైనా వాహనాలు వెనుదిరిగినట్టు అధికార వర్గాలు తెలిపాయి.

సరిహద్దులో చైనా దుశ్చర్యలు రోజురోజుకు మితిమీరుతున్నాయి. తాజాగా.. భారత్​వైపు వాస్తవాధీన రేఖ వెంబడి ఉన్న చుముర్​ ప్రాంతంలోకి చొరబడేందుకు చైనా ప్రయత్నించినట్టు సమాచారం. అయితే చైనా చర్యలను భారత సైన్యం సమర్థవంతంగా తిప్పికొట్టినట్టు తెలుస్తోంది.

చిపుజి క్యాంపు నుంచి దాదాపు 8 భారీ వాహనాల్లో చైనా దళాలు భారత్​లోకి ప్రవేశించడానికి ప్రయత్నించినట్టు అధికార వర్గాలు తెలిపాయి. అయితే అప్పటికే ఆ ప్రాంతంలో భారీ స్థాయిలో ఉన్న భారత బలగాలను చూసి ఆ వాహనాలు వెనుదిరిగినట్టు పేర్కొన్నాయి.

ఈ నేపథ్యంలో ముందస్తు జాగ్రత్తగా ఆ ప్రాంతంలో అదనపు బలగాలను భారత్​ మోహరించినట్టు తెలుస్తోంది. ఎల్​ఏసీ వెంబడి చైనా చొరబాట్లను అడ్డుకునేందుకు అధికారులు నిఘా వ్యవస్థను మరింత బలోపేతం చేసినట్టు సమాచారం.

ఇదీ చూడండి:-