ముగ్గురు మంత్రులకు కరోనా పాజిటివ్​

దేశంలో కరోనా వ్యాప్తి రోజురోజుకూ పెరుగుతోంది. ముఖ్యమంత్రులు, కేంద్ర మంత్రులు, ఎమ్మెల్యేలు అనేక మంది ప్రముఖులు కరోనా బారిన పడ్డారు. తాజాగా పలు రాష్ట్రాలకు చెందిన మంత్రులకు మహమ్మారి సోకింది.

కరోనా వైరస్​ సామాన్యులనే కాకుండా రాజకీయ నాయకులను సైతం వదలటం లేదు. తాజాగా కేరళ పరిశ్రమల శాఖ మంత్రి జయరాజన్ వైరస్​ బారిన పడ్డారు. ఇప్పటికే పినరయి విజయన్ కేబినేట్​లో ఇద్దరు మంత్రులు వైరస్​ బారిన పడ్డారు.

సదరు మంత్రితో పాటు ఆయన సతీమణి కూడా కరోనా బారిన పడ్డారు. దీంతో వీరిద్దరిని కాన్నూర్​లోని పరియరామ్​ మెడికల్​ కాలేజీ ఆసుపత్రి తరలించి చికిత్స అందిస్తున్నారు. అంతకుమునుపు ఆ రాష్ట్ర ఆర్థిక మంత్రి థామస్ ఐజాక్ కరోనా పాజిటివ్​గా తేలింది. ఐజాక్ సన్నిహితుల్లో జయరాజన్​ ఉండటం వల్ల మూడో రోజుల క్రితం నమూనాను పరీక్షకు పంపగా.. శుక్రవారం పాజిటివ్​గా నిర్ధరణ అయ్యింది.

ఒడిశా మంత్రికి..

మరో వైపు ఒడిశా మహిళా, శిశు అభివృద్ధి, మిషన్ శక్తి మంత్రి తుకుని సాహు కూడా కరోనా బారిన పడ్డారు. ఈ విషయాన్ని ఆమె స్వయంగా ట్విట్టర్​ ద్వారా వెల్లడించారు. తుకుని సాహుతో కలిపి ఆ రాష్ట్రంలో వైరస్​ సోకిన మంత్రుల సంఖ్య ఐదు చేరింది.

ప్రస్తుతం హోం ఐసోలేషన్​లో ఉన్నట్లు తెలిపిన మంత్రి.. గత కొద్ది రోజులుగా తనను కలిసిన వారు పరీక్షలు చేయించుకోవాల్సిందిగా కోరారు. రాష్ట్రంలో ముగ్గురు లోక్​సభ సభ్యులకు, మరి కొంత మంది అధికార పార్టికి చెందిన ఎమ్మెల్యేలకు కరోనా పాజిటివ్​గా తేలింది.

యూపీ మంత్రికి కూడా...

ఉత్తర్​ప్రదేశ్ జైళ్ల శాఖ మంత్రి జై కుమార్ సింగ్​కు శుక్రవారం కరోనా పాజిటివ్​గా నిర్ధరణ అయ్యింది. వైద్యుల సలహా మేరకు హోం ఐసోలేషన్​ ఉన్నట్లు ట్విట్టర్ ద్వారా తెలిపారు. ఇప్పటివరకు రాష్ట్రంలో మొత్తం 12 మంది మంత్రులు కరోనా బారినపడ్డారు.