పౌరసత్వ బిల్లుకు వ్యతిరేకంగా అసోంలో నిరసనలు

పార్లమెంటులో పౌరసత్వ చట్ట సవరణ బిల్లును ప్రవేశపెట్టడాన్ని వ్యతిరేకిస్తూ అసోంలో నిరసన జ్వాలలు చెలరేగాయి. కృషక్​ ముక్తి సంగ్రామ్​ సమితితోపాటు పలు సంస్థల ఆధ్వర్యంలో ర్యాలీలు నిర్వహించారు. ఎట్టి పరిస్థితుల్లోనూ ఈ బిల్లును అంగీకరించమని తేల్చి చెబుతున్నారు.

పౌరసత్వ చట్ట సవరణ బిల్లు-2019కు వ్యతిరేకంగా అసోంవ్యాప్తంగా నిరసనలు జరుగుతున్నాయి. గువహటిలో సామాజిక కార్యకర్త అఖిల్​ గొగొయి నేతృత్వంలోని కృషక్ ముక్తి సంగ్రామ్ సమితి(కేఎంఎస్ఎస్) ఆధ్వర్యంలో బిల్లును నిరసిస్తూ 'రాజ్​భవన్​ ఛలో' కార్యక్రమాన్ని నిర్వహించారు.

పార్లమెంటు శీతాకాల సమావేశాల్లో ఈ బిల్లు ప్రవేశాన్ని వ్యతిరేకిస్తూ అసోం గవర్నర్​కు తీర్మానాన్ని పంపారు. దీనిని రాష్ట్రపతికి చేరవేయాల్సిందింగా కోరారు అఖిల్​. కేఎంఎస్​ఎస్​తో పాటు యూఎల్​ఎఫ్ఏ నేతలు అనుప్​ ఛెతియా, మృణాల్ హజారికా, మరో కార్యకర్త లచిత్ బోర్డోలోయి వేర్వేరుగా నిరసనలు చేపట్టారు.

"ఈ బిల్లుతో విదేశీయులు అసోంలోకి ప్రవేశిస్తారు. సుమారు 1.9 కోట్ల మంది హిందూ బంగ్లాదేశీయులు మా ఉద్యోగాలను పొందుతారు. ఫలితంగా అసలైన స్థానికుల్లో నిరుద్యోగం పెరుగుతుంది."

-అఖిల్ గొగొయి, సామాజిక కార్యకర్త

అసోంను మతప్రాతిపదికన విభజించాలని కేంద్రం ప్రయత్నిస్తోందని సాహిత్య అకాడమీ అవార్డు గ్రహీత డాక్టర్​ హిరేన్​ గోహైన్​ ఆరోపించారు. తమ ప్రాణాలు ఉన్నంతవరకు ఈ బిల్లును అంగీకరించమని తేల్చిచెప్పారు.

ఆల్ అసోం స్టూడెంట్స్ యూనియన్​(ఏఏఎస్​యూ) కూడా నిరసనల్లో పాల్గొంది. అక్రమంగా వచ్చిన బంగ్లాదేశీలను అక్కున చేర్చుకోవటానికి అసోం చెత్త బుట్ట కాదని వ్యాఖ్యానించారు ఏఏఎస్​యూ నేతలు.

ఇదీ చూడండి: 'గాంధీ'ల కోసం వచ్చేవారం లోక్​సభలో 'ప్రత్యేక' బిల్లు