'రేపిస్టుకు రాఖీ కట్టించడం డ్రామా కాదా?'

లైంగిక వేధింపుల కేసుల్లో వ్యవహరించాల్సిన తీరుపై న్యాయమూర్తులకు అవగాహన కల్పించడం అవసరమని పేర్కొన్నారు అటార్నీ జనరల్​ కేకే వేణుగోపాల్​. లింగ సున్నితత్వాన్ని గుర్తించాల్సిన అవసరం ఉందని నొక్కి చెప్పారు. వేధింపుల కేసులో బెయిల్​ మంజూరు చేస్తూ బాధితురాలితో రాఖీ కట్టించుకోవాలని షరతు విధించటం ఒక నాటకమని పేర్కొన్నారు. ఇలాంటి కేసుల్లో వాస్తవాలపై దృష్టి పెట్టాల్సిన ఆవశ్యకత ఉందన్నారు.

లైంగిక వేధింపుల కేసుల్లో బాధితురాలితో రాఖీ కట్టించుకోవాలని నిందితుడిని ఆదేశించడాన్ని ఒక నాటకంగా అభివర్ణించారు అటార్నీ జనరల్​ కేకే వేణుగోపాల్​. లింగ సున్నితత్వాన్ని గుర్తించాల్సిన అవసరం ఉందని నొక్కి చెప్పారు. ఇలాంటి కేసుల్లో బెయిల్​ మంజూరు చేసే క్రమంలో ముఖ్యంగా వాస్తవాలపై దృష్టి పెట్టాల్సిన ఆవశ్యకతపై న్యాయమూర్తులకు అవగాహన కల్పించటం అవసరమని సూచించారు.

లైంగిక వేధింపుల కేసులో మధ్యప్రదేశ్​ హైకోర్టు నిందితుడికి బెయిల్​ ఇస్తూ బాధితురాలితో రాఖీ కట్టించుకోవాలనే షరతు విధించడంపై దాఖలైన పిటిషన్​ను విచారించింది జస్టిస్​ ఏఎం ఖాన్​విల్కర్​ నేతృత్వంలోని సుప్రీం ధర్మాసనం. ఈ సందర్భంగా తన వాదనలు వినిపించారు అటార్నీ జనరల్​.

" లింగ సున్నితత్వం కచ్చితంగా పరిగణనలోకి తీసుకోవాలి. ఇలాంటి కారణాలతో బెయిల్​ ఇవ్వటం సరికాదని జాతీయ న్యాయ అకాడమీ, రాష్ట్ర అకాడమీలు బోధించాలి. న్యాయమూర్తుల నియామక పరీక్షల్లోనూ లింగ సున్నితత్వంపై ఓ విభాగం ఉండాలి. లైంగిక వేధింపుల కేసులో బాధితురాలితో రాఖీ కట్టించుకోవాలని చెప్పడం పూర్తిగా నాటకం. న్యాయమూర్తులు వాస్తవ విషయాలపై దృష్టి పెట్టాలి. న్యాయ అకాడమీల్లో ఉన్నత న్యాయస్థానాల తీర్పుల గురించి బోధించాలి."

- కేకే వేణుగోపాల్​, అటార్నీ జనరల్

ఓ లైంగిక వేధింపుల కేసులో బాధితురాలి ఇంటికి వెళ్లి.. తనను ఎల్లప్పుడూ రక్షించుకుంటాననే వాగ్దానంతో రాఖీ కట్టించుకోవాలని షరతు విధిస్తూ జులై 30న మధ్యప్రదేశ్​ హైకోర్టు బెయిల్​ ఇచ్చింది. హైకోర్టు తీర్పుపై స్టే విధించాలని సుప్రీం కోర్టును ఆశ్రయించారు తొమ్మిది మంది మహిళా న్యాయవాదులు. దేశవ్యాప్తంగా న్యాయస్థానాలు ఇలాంటి చట్ట విరుద్ధమైన షరతులను విధించకుండా నిరోధించాలని కోరారు.

ఇదీ చూడండి: రాహుల్​ ఎన్నికపై దాఖలైన పిటిషన్ కొట్టివేత