కలిసి నెల కూడా కాలేదు. అయినా అతడంటే ఆమెకు ఎనలేని ఇష్టం ఏర్పడింది. ఎంతంటే హత్య కేసులో జైలుకు వెళ్లిన బాయ్ఫ్రెండ్ కోసం తానూ జైలుకు వెళ్లేంత! అవును.. దిల్లీలోని తీహార్ జైల్లో బందీగా ఉన్నఓ నిందితుడిని కలిసేందుకు అతడి ప్రియురాలు ఎన్జీఓ వాలంటీర్ అని చెప్పి చెరసాలలో చొరబడింది.
ప్రియతమా జైల్లో నీవు కుశలమా?
తీహార్ జైల్లో బందీగా ఉన్న ప్రియుడి పట్ల విరహాన్ని తాళలేకపోయింది ప్రేయసి. అధికారుల కళ్లు గప్పి స్వచ్ఛంద సంస్థ వాలంటీర్గా చెప్పి జైల్లోకి చొరబడింది. జైలు సిబ్బంది కూడా ఆమె గురించి తెలుసుకునే ప్రయత్నం చేయలేదు. తనిఖీ చేయకుండానే జైల్లోకి అనుమతించారు. ఇంకేముంది ప్రేమకు అడ్డేదీ లేదని మురిసిపోయి గంటల తరబడి సమయం గడిపింది. తన ప్రియునికి బోర్ కొడుతుందేమోనని తెగ బాధపడిపోయి రోజూ జైలుకు వెళ్లి కాలక్షేపం చేసింది.
అలా మొదలైంది..
ఆ మహిళకు ముందే పెళ్లయి ఓ కూతురు కూడా ఉంది. ఇప్పుడు ఒంటరిగా ఉంటూ... తోడు కోసం వెతుకుతోంది. మాట్రిమోనియల్ వెబ్సైట్లో వారిద్దరికీ పరిచయం ఏర్పడింది.
హేమంత్ ఓ హత్య కేసులో నిందితుడిగా జైలుకు వెళ్లాడు. కానీ తాను 'మాట్రిమొనీ' బయోడేటాలో తీహార్ జైలు ఉద్యోగిగా నమోదు చేసుకున్నాడు. జులై 26 పెరోల్పై వెళ్లి ఆమెను కలిశాడు. అలా ఒకరినొకరు ఇష్టపడ్డారు. పెరోల్ గడువు ముగియగానే ఖైదీ నెం. 2 గా తిరిగి జైలుకు వచ్చేశాడు.
ప్రేమను అనుమానించని అధికారులు
ఖైదీ ప్రియురాలు ఇలా జైల్లోకి వస్తూ పోతూ గంటల తరబడి గడుపుతున్నా అధికారులు మాత్రం ఆమెపై ఎలాంటి అనుమానం వ్యక్తం చేయలేదు. 4 రోజులు గడిచాక అసలు విషయం తెలుసుకుని ఆశ్చర్యపోవడం వారి వంతైంది. ప్రస్తుతం విచారణ జరుగుతోంది. పూర్తి వివరాలు తెలిశాక తీహార్ జైలు సిబ్బంది, అధికారుల భవితవ్యం తేలనుంది.
ఇదీ చూడండి: హోలీకి 51టన్నుల లడ్డూలు
