జీపులో నుంచి పడిన చిన్నారి తల్లిదండ్రులపై కేసు కేరళ ఇడుక్కీ జిల్లాలోని మున్నార్‌లో కదులుతున్న జీపులో నుంచి కింద పడిపోయిన చిన్నారి తల్లిదండ్రులపై కేసు నమోదైంది.సోమవారం అటవీ ప్రాంతంలో, చీకట్లో వెళ్తున్న జీపులోంచి ఓ బిడ్డ తల్లి ఒడి నుంచి జారి అడవిలో పడిపోయింది. అటవీ శాఖ పుణ్యమా అని పాప సురక్షితంగా మళ్లీ తల్లి ఒడి చేరిన దృశ్యాలు సామాజిక మాధ్యమాల్లో హల్చల్ చేశాయి. ఏడాదిన్నర చిన్నారిని ఒడిలో పెట్టుకుని అంత అజాగ్రత్తగా ఎలా ఉంటారనే ప్రశ్నలు వెల్లువెత్తాయి.
ఈ విషయాన్ని తీవ్రంగా పరిగణించిన పోలీసులు... తల్లిదండ్రులపై చర్యలు తీసుకున్నారు. అటవీ శాఖ అధికారులు ఇచ్చిన వాంగ్మూలం మేరకు బాలల చట్టంలోని సెక్షన్ 75 కింద కేసు నమోదు చేసి, దర్యాప్తు జరుపుతున్నారు. కేరళ రాష్ట్ర బాలల హక్కుల పరిరక్షణ కమిషన్లోనూ వీరిపై కేసు నమోదైంది.
