'స్పెల్లింగ్ ​బీ'లో మళ్లీ మనోళ్లే అదరగొట్టారు

ప్రతిష్టాత్మక 'స్క్రిప్స్​ నేషనల్​ స్పెల్లింగ్ బీ' పోటీల్లో ఎనిమిది మంది విద్యార్థులు విజేతలుగా నిలిచారు. వీరిలో ఆరుగురు భారత సంతతి విద్యార్థులు కావడం విశేషం. గత 94 ఏళ్లలో ఇలా ఇద్దరికి మించి విజేతలుగా నిలవడం ఇదే మొదటిసారి.

అమెరికాలో నిర్వహించే ప్రతిష్టాత్మక 'స్క్రిప్స్​ నేషనల్​ స్పెల్లింగ్​ బీ' పోటీల్లో ఆరుగురు భారత సంతతి విద్యార్థులు చరిత్ర సృష్టించారు. విజేతలుగా నిలిచి ఒక్కొక్కరు 50 వేల అమెరికన్​ డాలర్ల నగదు, బహుమతులు గెలుచుకున్నారు.

565 మంది విద్యార్థులు పాల్గొన్న ఈ మెగా​ పోటీలో ఈసారి ఎనిమిది మంది విద్యార్థులు విజేతలుగా నిలవడం విశేషం. అందులో ఆరుగురు భారత సంతతి విద్యార్థులు ఉండటం మరో విశేషం. గత 94 ఏళ్లలో ఇలా ఇద్దరికి మించి గెలవడం ఇదే మొదటిసారి.

విజేతలు వీరే..

• రిషిక్ గంధశ్రీ (13), కాలిఫోర్నియా
• సాకేత్ సుందర్​ (13), మేరీలాండ్​
• శృతికా పాడి (13), న్యూజెర్సీ
• సోహమ్​ సుఖాంకర్​ (13), టెక్సాస్​
• అభిజయ్​ కొడాలి (12), టెక్సాస్​
• రోహన్​ రాజా (13), టెక్సాస్​
• క్రిస్టోఫర్​ సెర్రో (13), న్యూజెర్సీ
• ఎరిన్​ హోవార్డ్ (14), అలబామా

ఐదు రౌండ్లపాటు జరిగిన ఈ పోటీల్లో ఈ ఆరుగురు బాలురు, ఇద్దరు బాలికలు... తమను అడిగిన 47 పదాలకు స్పెల్లింగ్​లను సరిగ్గా చెప్పి విజేతలుగా నిలిచారు. మేరీల్యాండ్​.. గెలోర్డ్​ నేషనల్​ రిసార్ట్​లో నిర్వహించిన ఈ కార్యక్రమాన్ని ఈఎస్​పీఎన్​ ప్రత్యక్ష ప్రసారం చేసింది.

మెగా పోటీ....

సుమారు 7 నుంచి 14 ఏళ్లలోపు బాలబాలికలు మాత్రమే పాల్గొనే ఈ స్పెల్లింగ్ ​బీ పోటీల్లో... అమెరికాతో పాటు కెనడా, ఘనా, జమైకా తదితర దేశాల విద్యార్థులు పాల్గొనే అవకాశం ఉంది. అత్యంత భారీ స్థాయిలో, ఎంతో ఒత్తిడితో కూడుకున్న ఈ పోటీల కోసం విద్యార్థులు నెలల తరబడి శిక్షణ పొందుతారు.

ఇదీ చూడండి: జేపీ నడ్డాకు భాజపా సారథ్య బాధ్యతలు!