డ్రైవర్​ నిర్లక్ష్యానికి 29 మంది బలి

ఉత్తరప్రదేశ్​లోని ఆగ్రా​ యమునా ఎక్స్​ప్రెస్ హైవేపై ఘోర రోడ్డు ప్రమాదం జరిగింది. డ్రైవర్ నిద్ర, నిర్లక్ష్యపూరిత డ్రైవింగ్ కారణంగా బస్సు అదుపు తప్పి వంతెన పైనుంచి ఝర్నా కాలువలో పడింది. ఈ దుర్ఘటనలో 29 మంది ప్రాణాలు కోల్పోయారు. క్షతగాత్రుల్ని ఆసుపత్రికి తరలించి చికిత్స అందిస్తున్నారు. ప్రమాదం పట్ల ప్రధానమంత్రి నరేంద్రమోదీ తీవ్ర దిగ్భ్రాంతి వ్యక్తం చేశారు. సీఎం యోగి ఆదిత్యనాథ్ ఘటనపై కమిటీని ఏర్పాటు చేసి.. 24 గంటల్లోగా నివేదిక అందించాలని ఆదేశించారు.

ఉత్తరప్రదేశ్​లో ఘోర రోడ్డు ప్రమాదం జరిగింది. ఆగ్రా సమీపంలోని యమునా ఎక్స్​ప్రెస్ హైవేపై ఉన్న వంతెన పైనుంచి అమాంతం కింద ఉన్న కాలువలో పడిపోయింది ఓ బస్సు. ఈ దుర్ఘటనలో 29 మంది ప్రాణాలు కోల్పోయారు.

లఖ్​నవూ నుంచి 50 మంది ప్రయాణికులతో దిల్లీ ఆనంద్​ విహార్​కు బయల్దేరిన బస్సు... డ్రైవర్ నిర్లక్ష్యం, నిద్ర కారణంగా ఉదయం నాలుగున్నర గంటల ప్రాంతంలో యమునా ఎక్స్​ప్రెస్ హైవేపై ఎత్మాద్​పూర్ వంతెన పై నుంచి ఝర్నా కాలువలో పడింది. ఈ విషాద ఘటనలో ఏడాదిన్నర సంవత్సరాల చిన్నారి సహా 29 మంది మృతి చెందారు. క్షతగాత్రులను ఆసుపత్రికి తరలించి చికిత్స అందిస్తున్నారు. సహాయక చర్యలు కొనసాగుతున్నాయి.

ఈ ఘటనపై యూపీ సీఎం యోగి ఆదిత్యనాథ్‌ దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. క్షతగాత్రులకు మెరుగైన వైద్యం అందించాలని అధికారులను ఆదేశించారు.

ఉత్తర్​ప్రదేశ్​ రవాణా శాఖ మృతుల కుటుంబాలకు రూ. 5 లక్షల చొప్పున పరిహారం ప్రకటించింది. ప్రమాదంపై రవాణాశాఖ మంత్రి, అధికారులతో కూడిన ఓ కమిటీని ఏర్పాటు చేశారు సీఎం. 24 గంటల్లోగా ఘటనపై నివేదిక అందించాలని సూచించారు.

ప్రధానమంత్రి సంతాపం

ప్రధానమంత్రి నరేంద్రమోదీ ఆగ్రా రోడ్డు ప్రమాదం పట్ల తీవ్ర దిగ్భ్రాంతి వ్యక్తం చేశారు. 29 మంది మృతి పట్ల తీవ్ర సంతాపాన్ని వ్యక్తం చేశారు. క్షతగాత్రులకు అవసరమైన అన్ని సౌకర్యాలను రాష్ట్ర ప్రభుత్వం అందిస్తుందని ప్రకటించారు.

రోడ్డు ప్రమాదంపై రక్షణ మంత్రి రాజ్​నాథ్ సింగ్ తీవ్ర విచారం వ్యక్తం చేశారు. సీఎం యోగితో ఘటనపై సంభాషించారు. మృతుల కుటుంబాలకు సానుభూతి వ్యక్తం చేశారు. క్షతగాత్రులు త్వరగా కోలుకోవాలని ఆకాంక్షించారు.

భాజపా కార్యనిర్వాహక అధ్యక్షుడు జేపీ నడ్డా రోడ్డు ప్రమాద మృతులకు సంతాపం తెలిపారు. ఘటన తీవ్ర దురదృష్టకరమైనదిగా అభివర్ణించారు.

ఇదీ చూడండి: 'గో సంరక్షణ' పేరుతో మరో మూకదాడి