సామాన్యుడి ఇంటి కరెంటు బిల్లు రూ.128 కోట్లు!
ఉత్తర్ ప్రదేశ్‌లో విద్యుత్ శాఖ అధికారుల నిర్లక్ష్యం వెలుగు చూసింది. రాష్ట్రంలోని హాపూర్‌ పరిధిలోని ఛామ్రీ గ్రామానికి చెందిన షామీమ్‌ అనే నిరుపేదకు ఏకంగా రూ.128 కోట్ల 45 లక్షల విద్యుత్ బిల్లు వేశారు. బిల్లు కట్టలేదని విద్యుత్ కనెక్షన్ తొలగించారు.
బిల్లును చూసి షాకైన షామీమ్‌ విద్యుత్ అధికారుల వద్దకు వెళ్లి నిలదీశాడు. ఇంతమొత్తంలో ఎందుకు కట్టాలో చెప్పాలని కోరాడు. ఎంతమాత్రం స్పందించని అధికారులు రూ.128 కోట్లు కట్టి తీరాలని, లేకపోతే విద్యుత్ కనెక్షన్ తిరిగి ఇచ్చేది లేదని తేల్చి చెప్పారు. ఏం చేయాలో తెలియని స్థితిలో షామీమ్‌ మీడియాను ఆశ్రయించాడు. తనకు జరిగిన అన్యాయాన్ని చెప్పుకొన్నాడు.
'ఇది నా ఇంటి వరకే వచ్చినట్లు లేదు. రాష్ట్రం మొత్తం బిల్లు నాతోనే కట్టించాలనుకున్నారేమో. నాకు న్యాయం చేయండి' అని ఆవేదన వ్యక్తం చేశాడు షామీమ్‌.