Ayodhya Ram Mandir Construction : చివరి దశకు అయోధ్య రామమందిర నిర్మాణం.. భక్తుల కోసం 13 కి.మీ 'రామ్​పథ్'..

Ayodhya Ram Mandir Construction Status : అయోధ్యలో రామమందిర నిర్మాణ పనులు యుద్ధప్రాతిపదికన జరుగుతున్నాయి. మరో రెండు నెలల్లో గ్రౌండ్‌ ఫ్లోర్‌ పనులను పూర్తి చేయాలని ట్రస్టు నిర్దేశించింది. మరోవైపు బనారస్‌ నుంచి అర్చకులు అయోధ్యకు చేరుకున్నారని తెలిపింది.

Ayodhya Ram Mandir Construction Status :అయోధ్యలోరామ మందిర నిర్మాణ పనులు శరవేగంగా సాగుతున్నాయి. రామ్‌లల్లా విగ్రహ ప్రతిష్టాపన (Ayodhya Ram Mandir Inauguration) తేదీని ఖరారు చేసిన క్రమంలో నిర్మాణ పనులు వేగంగా జరుగుతున్నాయి. గ్రౌండ్‌ ఫ్లోర్‌ నిర్మాణ పనులు చివరిదశకు చేరుకోగా.. గర్భగుడి ఫ్లోరింగ్‌ చకచకా సాగుతోంది. విగ్రహాన్ని ప్రతిష్ఠించే స్థలానికి తుది మెరుగులు దిద్దుతున్నారు. గ్రౌండ్ ఫ్లోర్‌లో తలుపులు, కిటికీలను అమర్చుతున్నారు. డిసెంబర్‌ నాటికి ఈ పనులన్నీ పూర్తికానున్నాయి. ప్రస్తుతం గ్రౌండ్‌ ఫ్లోర్‌లోని స్తంభాలపై రామాయణ ఘట్టాలను వివరించే శిల్పాలను తీర్చిదిద్దుతున్నారు.

కొనసాగుతున్న అయోధ్య రామమందిర నిర్మాణం

"వివిధ ప్రాంతాల నుంచి రాళ్ళను ఇక్కడికి తీసుకొచ్చాం. వాటిని చెక్కేందుకు వేరేచోట్లకు తరలించాం. అవి తిరిగి వచ్చాక ప్రతిష్టిస్తాం. అంతలోపు ఇక్కడి పనులు పూర్తవుతాయి. స్తంభాలపై శిల్పాలను చెక్కే పని జరుగుతోంది. 70 స్తంభాలను ఇక్కడ ఏర్పాటు చేయనున్నాం"
--అనిల్‌ మిశ్ర, రామమందిర ట్రస్టు సభ్యుడు

13 కిలో మీటర్ల 'రామ్​పథ్​'..
Ayodhya Ram Mandir Update : రాముడి విగ్రహ ప్రతిష్టాపనకు అధిక సంఖ్యలో భక్తులు తరలివచ్చే అవకాశం ఉందని అధికారులు భావిస్తున్నారు. వచ్చిన భక్తులకు ఎలాంటి ఇబ్బంది కలగకుండా తీసుకోవాల్సిన చర్యలపై సమావేశాలు నిర్వహిస్తున్నారు. అయోధ్య రాముడి దర్శనం కోసం వచ్చే భక్తులు సులభంగా ఆలయానికి చేరుకోడానికి.. సహదత్​గంజ్​ నుంచి నయా ఘాట్​ వరకు దాదాపు 13 కిలో మీటర్ల పొడవైన 'రామ్​పథ్​'ను (Rampath Ayodhya) నిర్మిస్తున్నామని డిస్ట్రిక్ట్​ మేజిస్ట్రేట్​- డీఎమ్ నీతీశ్​ కుమార్​ తెలిపారు. ఈ రామ్​పథ్​ నిర్మాణాన్ని మూడు దశల్లో చేపడుతున్నట్లు చెప్పారు. డిసెంబర్​లోపు ఈ రామ్​పథ్​ నిర్మాణం పూర్తవుతుందని వెల్లడించారు.

జరుగుతున్న రామ్​పథ్​ నిర్మాణ పనులు..

రామమందిర ప్రాంగణంలో భవన సముదాయం

25 వేల మంది అతిథులకు ఆహ్వానం!
వచ్చే ఏడాది జనవరి 21 నుంచి 23వ తేదీల మధ్య రాముడి విగ్రహప్రతిష్టాపనకు (Ayodhya Ram Mandir Opening Date) ట్రస్టు ప్రణాళిక సిద్ధం చేసింది. ఈ కార్యక్రమానికి ఆహ్వానించే అతిథుల జాబితాపై ట్రస్టు దృష్టి సారించింది. ప్రధాని నరేంద్ర మోదీ సహా మొత్తం 25వేల మందిని ప్రాణ ప్రతిష్ఠ కార్యక్రమానికి ఆహ్వానించనున్నట్లు.. ట్రస్టు ఇదివరకే ప్రకటించింది. ఇప్పటికే బనారస్‌ నుంచి అర్చకులను శంకరాచార్య.. అయోధ్యకు పంపించారని ట్రస్టు పేర్కొంది. ఏయే పూజలు నిర్వహించాలో నిర్ణయం తీసుకుంటామని వివరించింది.

రామమందిర ప్రాంగణంలో కొనసాగుతున్న నిర్మాణ పనులు