కేబినెట్ విస్తరణకు ముందు పలువురు కేంద్ర మంత్రులు వరుసగా తమ రాజీనామాలను సమర్పించారు. కేంద్ర విద్యా శాఖ మంత్రి రమేశ్ పోఖ్రియాల్, రసాయనాలు-ఎరువుల శాఖ మంత్రి డీవీ సదానంద గౌడ, ఆరోగ్య శాఖ మంత్రి హర్షవర్ధన్ రాజీనామా చేసిన వారిలో ఉన్నారు. రవిశంకర్ ప్రసాద్, ప్రకాశ్ జావడేకర్ సైతం మంత్రివర్గం నుంచి తప్పుకున్నారు.
మొత్తం 12 మంది మంత్రుల రాజీనామాలను రాష్ట్రపతి రామ్నాథ్ కోవింద్ ఆమోదించారు. ఈ మేరకు రాష్ట్రపతి భవన్ ఓ ప్రకటన విడుదల చేసింది.
ఆరోగ్య కారణాలతో పోఖ్రియాల్ రాజీనామా చేసినట్లు సంబంధిత వర్గాలు తెలిపాయి. కొవిడ్ బారిన పడ్డ ఆయన ఏప్రిల్ నెలలో దిల్లీ ఎయిమ్స్లో చేరారు. ఆ తర్వాత కొవిడ్ అనంతర సమస్యలతో జూన్లో మరోసారి ఆస్పత్రిపాలయ్యారు. ఈ నేపథ్యంలోనే.. ఆయన రాజీనామా చేసినట్లు సమాచారం.
రాజీనామా చేసింది వీరే...
రాజీనామా చేసిన 12 మంది మంత్రుల వివరాలు ఇలా..
- డాక్టర్ హర్షవర్ధన్- కేంద్ర ఆరోగ్య, కుటుంబ సంక్షేమ శాఖ మంత్రి
- ప్రకాశ్ జావడేకర్- కేంద్ర పర్యావరణం, అటవీ- పర్యావరణ మార్పులు, భారీ పరిశ్రమల శాఖ మంత్రి
- రవిశంకర్ ప్రసాద్- కేంద్ర న్యాయ, ఎలక్ట్రానిక్స్- ఐటీ- కమ్యూనికేషన్స్ శాఖ మంత్రి
- రమేశ్ పోఖ్రియాల్- కేంద్ర విద్యా శాఖ మంత్రి
- సదానంద గౌడ- కేంద్ర రసాయనాలు, ఎరువుల శాఖ మంత్రి
- బాబుల్ సుప్రియో- కేంద్ర పర్యావరణ శాఖ సహాయ మంత్రి
- సంతోష్ గంగవార్- కేంద్ర కార్మిక శాఖ మంత్రి
- సంజయ్ ధోత్రే- కేంద్ర విద్యాశాఖ సహాయ మంత్రి
- దేబశ్రీ చౌదరి- కేంద్ర మహిళా, శిశు అభివృద్ధి శాఖ సహాయ మంత్రి
- థావర్‌చంద్‌ గెహ్లోత్‌- సామాజిక న్యాయం, సాధికరత శాఖ మంత్రి
- ప్రతాప్ సారంగి- పశు సంవర్ధక, పాడి, మత్స్య, ఎంఎస్ఎంఈ శాఖ సహాయ మంత్రి
- రతన్‌లాల్ కటారియా- జల్ శక్తి, సామాజిక న్యాయం సాధికారత శాఖ సహాయ మంత్రి
'అడిగారు.. చేశాను'
రాజీనామా చేయాలని కోరినందున, అందుకు అనుగుణంగా తాను నడుచుకున్నానని బాబుల్ సుప్రియో పేర్కొన్నారు. దేశానికి సేవచేసే అవకాశాన్ని ఇచ్చినందుకు ప్రధాని మోదీకి ధన్యవాదాలు చెబుతున్నట్లు ఫేస్బుక్ పోస్ట్లో తెలిపారు.
రాజీనామా విషయాన్ని గంగవార్ ధ్రువీకరించారు. కేంద్రంలో తర్వాత తనకు అప్పగించే బాధ్యతలపై స్పష్టతలేదని చెప్పారు.
ఇదీ చదవండి:మోదీ కేబినెట్లో భారీ మార్పులు- కొత్తగా 43 మంది...
