రోడ్డుపైకి దూసుకొచ్చిన గేదెలు - అదుపుతప్పి బోల్తా పడిన ప్రైవేట్ ట్రావెల్ బస్సు

Bus accident in Nellore: నెల్లూరు జిల్లా మర్రిపాడు మండలంలో ఓ ప్రైవేట్ ట్రావెల్ బస్సు అదుపుతప్పి బోల్తా పడింది. కావేరి సంస్థకు చెందిన ప్రైవేట్ ట్రావెల్ బస్సు బెంగళూరు నుంచి పామూరు వైపు వెళుతుండగా మార్గమధ్యలో బుధవాడ వద్ద రోడ్డుపై ఉన్న గేదెలను తప్పించబోయి బోల్తా పడింది. ఈ ప్రమాదంలో బస్సు అంతా నుజ్జునుజ్జైంది. రోడ్డు పక్కకు దూసుకెళ్లి పల్టీ కొట్టడంతో అద్దాలు పగిలి ధ్వంసమైంది. బస్సులో మొత్తం 40 మంది ప్రయాణికులు ఉండగా.. పలువురికి స్వల్పంగా గాయాలయ్యాయి. బస్సు ఢీకొని రెండు గేదెలు అక్కడికక్కడే మృతి చెందాయి. 

సమాచారం అందుకున్న పోలీసులు సంఘటనా స్థలానికి చేరుకున్నారు. క్షతగాత్రులను 108 అంబులెన్స్​లో ఉదయగిరి, ఆత్మకూరు ప్రభుత్వ ఆసుపత్రులకు తరలించి చికిత్స అందిస్తున్నట్లు పోలీసులు తెెలిపారు. డ్రైవర్ అతివేగం కారణంగానే ఈ ప్రమాదం జరిగినట్లు స్థానికులు తెలిపారు.  ఈ ప్రమాదంలో గాయపడిన వారి వివరాలు తెలియాల్సి ఉంది. ఆత్మకూరు పోలీసులు కేసు నమోదు చేసుకుని దర్యాప్తు చేస్తున్నారు.