'నా భర్త నాకు కావాలి... లేదంటే చావే శరణ్యం'

అందరికీ న్యాయం చేయాల్సిన ఓ ఎస్ఐ... తనకు అన్యాయం చేశాడంటూ ఓ మహిళ ఆవేదన వ్యక్తం చేస్తోంది. తనను పెళ్లి చేసుకుని.. ఓ బిడ్డ పుట్టాక అనుమానం పేరుతో దూరం పెట్టాడని ఆరోపించింది. తప్పుడు కేసులతో వేధిస్తున్నాడని మీడియాకు తెలిపింది.

ఓ ఎస్సై తనను పెళ్లి చేసుకుని మోసం చేశారంటూ రాజకుమారి అని మహిళ మీడియా ఎదుట వాపోయింది. తన బిడ్డకు తండ్రి కావాలంటూ ఆవేదన చెందింది. కడప ప్రెస్​కబ్​లో ఆమె మీడియాకు తెలిపిన వివరాల ప్రకారం.... ''జిల్లాలోని సింహాద్రిపురం మండలం కసునూరుకు చెందిన రాజకుమారికి కర్నూలు జిల్లాకు చెందిన రాఘవయ్యతో 2014లో వివాహమైంది. అప్పటికి రాఘవయ్య ఎస్ఐ ఉద్యోగానికి ఎంపికయ్యాడు. వివాహమైన 4 నెలల తర్వాత ఎస్సై శిక్షణకు వెళ్ళాడు. కొంతకాలానికి రాజకుమారి ఓ మగబిడ్డకు జన్మనిచ్చింది. శిక్షణకు వెళ్లినప్పటి నుంచి ఇప్పటి వరకు తన భర్త రాఘవయ్య తనకు ఎలాంటి ఫోన్ చేయలేదు.'' తనపై తప్పుడు ఆరోపణలతో కోర్టులో కేసు దాఖలు చేశాడని బాధితురాలు తెలిపింది. ఏ కారణం లేకుండా తనను కాపురానికి పిలిపించుకోవటం లేదని చెప్పింది. 'నాకు నా భర్త... నా బిడ్డకు తండ్రి కావాలి' అంటూ మీడియా ఎదుట వాపోయింది. లేదంటే చావే శరణ్యం అంటూ విలపించింది.